Pedalkadaz pedalkada, konponbiderantz

Orain Presoak dinamikaren barruan bizikleta martxa antolatu dute, euskal presoen korapiloak lehenbailehen askatzea eskatzeko.

Ikerne Zarate Gartziarena

Errenteria-Orereta

2018/07/21

Orain Presoak dinamikaren barruan antolatutako bizikleta martxa gaur heldu da Errenteria-Oreretara.

Orain Presoak dinamikak, euskal presoen aldeko aldarria bizikleta gainera igo du. Gaur heldu da martxa hori Errenteria-Oreretara eta harrera egin diete Matxaingo biribilgunean martxan parte hartzen ari diren 60tik gora txirrindulariei. Atzerapenarekin heldu da martxa Errenteriara, eta ekitaldi xumea eginda indarrak hartzeko bazkaltzera joan dira Orain Presoak dinamikarekin bat egin dutenek. Bertsolariak hasi du ekitaldia, eta espetxetarako bidai amaiezinak amaitzeko gogoa eta beharra nabarmendu du. Konponbiderako, elkarbizitzarako eta bakerako unea dela esanez hartu du hitza Errenteria-Oreretako Sareko kideak, eta elkarrekin lan egiteko konpromisoa berretsi du, “elkarri begiratuz, elkarri entzunez, , elkarrekin bidea eginez, etorkizunari begira jarri nahi dugu”. Presoen gaia herritar orori gagokion ardura esan du bestalde, “guztiok merezi baitugu elkarbizitzan eta bakean oinarritutako jendarte baten bizitzea”. Hori lortzeko ordea, ezinbestekotzat jo du “korapiloa askatzea. Hain zuzen ere, gaur eta hemen batu gaituena. ETAk existitzeari utzi dion arren, 282 euskal preso daude euren senideengandik ehunka edo milaka kilometrora urrunduta”. Urrunketa egoera horrek haur eta adin nagusikoak zigortzen dituela zehaztu du Sareko kideak, eta espetxe politika aldatzea ezinbestekotzat jo du, “baina horretarako beharrezkoa da guztion bultzada eta konpromisoa”. Lehenbailehen konpondu beharrekoak aipatu ditu azkenik: Urruntzea, astebururo senide zein lagunek ehunka kilometro egitera behartuta daudelako; Larriki gaixo dauden presoen auzia; eta lehen graduen aldaketak, euskal presoek lehen graduan betetzen dute zigorraren %100, eta hori legez kontrakoa da”. Gaixotasun larri eta sendaezinak dituzten presoak aipatuta, Aitzol Gogorza eta Mikel Arrieta preso oreretarren egoera gogorarazi du Sareko ordezkariak, “bi herrikideen egoera salatzeko Bihotz Taupadak erakutsi ditugu herri honetan azken hilabeteetan”. Etorkizunari begiratzeko eta korapiloak askatzeko unea dela esan du, horrenbestez, “orain. Elkarbizitzarako unea, batu ezin izan garenok batzeko unea da orain. Orain presoen auzia konpontzeko unea da”. Horren harira, urriaren 20an antolatu duten manifestaziora deitu ditu herritarrak, “herri honetan inoiz izan den mobilizaziorik handiena izan dadin denok dugu ardura”. 15:30ean abiatuko da martxa Donostiarantz. Datozen etapak berriz, honakoak: Donostiatik Altsasura; eta Altsasutik Zaballako espetxera. Pedalkadaz pedalkada Orain presoak dinamikak Mont d’Marsan eta Zaballa lotuko ditu, “Zaballa espetxe politikaren aldaketaren ikur bilakatu nahi dugulako”.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.