Koldobike Gezalak eta Josetxo Etxandik lezoarren aitortza jasoko dute Santakrutz Jaietan. Herriko bi pilotaleku nagusiei haien izena jarriko diete.
Goiko Plazako pilotalekuak Josetxo Etxandi izena hartuko du.
Santakrutzetako ekitaldirik nabarmenetakoak herriko bi pilotariri egingo zaizkien omenaldiak izango dira. Gainera, omenaldiak ez dira bere horretan geldituko: Koldobike Gezalak eta Josetxo Etxandik frontoian izango dute herrian. Hau da, herriko bi pilotalekuei haien izenak jarriko dizkiete.
Koldobike Gezala. Argazkia: Gezala familia / Agustina Pontesta Garmendia.
Josetxo Etxandiren oroimenezko pilota txapelketen finalak baliatuko dituzte Lezoko bi pilotari historikoen izena eta balioak lau haizetara zabaltzeko. Hala, hilaren 14ko federatuen finalaren aurretik Bekoerrotako pilotalekuari
Koldobike Gezala Pilotalekua izena jartzeko ekitaldia egingo dute, plaka jartze eta guzti. Emakumeen kirolean aitzindari izan zen Gezala, raketista bezala aritu zen, eta haren irudia goresteko eta balioan jartzeaz gain, ondorengo belaunaldiek emakume kirolari hori aintzat har dezatela da izen aldaketaren helburua. Final horiek 17:30ean hasiko dira; lehentxeago izango da omenaldia, eta bertan, Gezalaren senideak izango dira lore sorta eta oroigarria jasotzen. Final horietako partidak, honakoak:
- Lau T’erdian banaka: Ariztegi-Atutxa.
- Lehen Mailako afizionatuak, binaka: Santxo-Gorrotxategi, Zubizarreta-Garmendiaren kontra.
- Etorkizuneko izarren finala, binaka: Alberdi-Bikuña, Elola-Elizegiren kontra.
Igandean, beste omenaldia
Igandean, hilaren 16an, Herri Mailako Josetxo Etxandi Txapelketaren finalak jokatuko dira. 17:30ean hasiko dira final horiek, eta bertan, Goiko Plazako pilotalekuari Josetxo Etxandi Pilotalekua izena jarriko diote ofizialki. Izena jartzeaz gain, Etxandiren senideak present egongo dira merezitako lore sorta eta plaka jasotzera.
Txapelketaren finalerdiak gaur (asteazkena) dira, hortaz, finalisten izenak ezin eman oraindik
