[Bideoa eta galeria] Igandera arte, santakrutzak!

Santakrutzak hasi dira. Alkate txikiek eta Munttarpeko kideek piztu zuten festa. Igandera arte 62 ekitaldi daude; batzuk, jada, berea eman dute.

Urko Etxebeste

Lezo

2018/09/14

Munttarpeko kideak, suziria botatzen.

Atzo arratsaldean hasi ziren 2018ko Santakrutz Jaiak. Aiora Intxaurrandieta eta Ioritz Intxaurandieta alkate txikien, eta Munttarpe Eskubaloi Taldearen ordezkariek egin zuten jaien hasierako pregoia eta suziriaren jaurtiketa, hurrenez hurren. Ondoren, Murixkako dantzarien eta Tomas Garbizu Musika Eskolako Bandakoek, batzuk dantzan besteak doinua jartzen, ohorezko aurreskuari ekin zioten. Jende asko Gurutze Santuaren plazan, beteta. Eta jai giroa nabarmena. Jaien hasiera Euskaraldiaren hamaikakoa aurkezteko baliatu zuten egitasmoa herrian garatzen ari direnek. Hamaika aurpegi ezagunek, bakoitzak Euskaraldia hitzaren hizki bat eskuan zuela, harro azaldu zuten azaro bukaeran hasiko den egitasmoarekin bat egin dutela, eta prest daudela nahi duen orori esateko merezi duela euskarak, Euskaraldian, eta beti. Handik aurrera festaz blai lezoarrak. Gauean batez ere egin zuen gora termometroak, herriko elkarteen danborradarekin. Horien irudiak, geroago. Behean, atzoko jaien hasierako ekitaldiaren bideoa eta galeria. Hemen segidan, gaurko egitaraua:

08:00. Gaupasa zaleen argazkia Gurutze Santuaren plazan.
10:00. Diana Munttar Lezoko Txistulari Elkartearekin.
10:00. Lopene plazan, haur jolasak Kulkirekin.
11:00. Meza nagusia.
12:00. Herri kirolak Gurutze Santuaren plazan.
12:30. Karlos Saldise plazatik, erraldoi eta buruhandiak.
14:30. I-14 egunari hasiera. Txupinazoa eta talde argazkia Gurutze Santuaren plazan.
14:30. Erretiratuen bazkaria Etxeberri jatetxean.
15:00. Arrantzale eta Tartekoen bazkaria Herri Eskolan.
16:45. Haurren krosa Euskal Herria plazan.
17:30. Bekoerrotako frontoian, Josetxo Etxandiren federatuen finalak.
18:00. Bekoerrotatik, erraldoi eta buruhandiak.
19:00. Plazan, Akerbeltz taldearekin dantzaldia.
20:00. Kartelada Gurutze Santuaren plazan.
22:00. Zezensuzkoa Gurutze Santuaren plazan.
23:00. DJ Bull Saldise plazan.

Lotura duten albisteak:

[Bideoa eta galeria] Igandera arte, santakrutzak!

+ Santakrutzak 2018. Egitaraua (PDF artxiboa da).

+ Txosnagunearen programazioa.

+ Herriko pilotariei omenaldiak.