Soldata arrakalaren kontra borrokan
Lanuzteak egiten ari dira polizia etxeetako eta epaitegietako garbiketan ari diren langileak; gaur elkarretaratzea egin dute Errenteria-Oreretan.
Kalera atera dira gaur polizia etxeetako eta epaitegietako garbitzaileak. Errenteriako Ertzaintzaren kuartelaren sarreran elkarretaratze zaratatsua egin dute, negoziazio eskatu eta soldata arrakala salatzeko.
ELA sindikatuko bozeramaile Mari Luz Rodriguezek azaldu duenez, Gipuzkoako polizia etxe eta epaitegietako garbiketako langileak dira borrokan ari direnak. Zerbitzua kudeatzen duen Garbialdi enpresarekin negoziatu nahi dute, soldata igoerak lortzeko. ELA, LAB, UGT, eta ESK sindikatuak ari dira negoziazioa lortu nahian. Izan ere, Rodriguezen esanetan “Garbialdi bileretara bertaratu bai, baina ez du negoziaziorako planteamendu bat mahai gainean jartzen”.
Eusko Jaurlaritzak adjudikatutako zerbitzuak direla nabarmendu du, bide batez, ELA sindikatuko bozeramaileak, eta datu zehatzak jakinarazi: “Polizia etxeetan 2008. urtetik dituzte soldata izoztuak, nahiz eta beren lan hitzarmena 2009. urtean bukatu. Epaitegien kasuan, soldata izoztea 2017. urtetik aurrerakoa da”, zehaztu du.
Rodriguezek gaineratu duenez, polizia etxeetako garbitzaileek lau urteetarako hitzarmena eskatzen dute, soldata arrakala desagerrarazteko. “Momentu honetan arrakala %13koa da polizia etxeetako garbitzaileen kasuan, eta epaitegietan %7koa”. Gipuzkoan kale garbiketan ari direnekin alderatuta ateratako datua da, kaleko garbitzaileek duten nekagarritasun-plusa kontuan hartu gabe ateratakoa.
“Soldata arrakala eta prekarietatea are handiagoak dira emakumeak nagusi diren kolektiboetan”, salatu du Rodriguezek, eta kasu hau da horren adibide argia dela gaineratu du, langileen %95 emakumeak direlako.
