Euskal presoen aldeko pedalkadak
Bizikleta martxan bat izan da gaur goizean hilaren 20ko 'Orain presoak' manifestaziora deitzeko
Gurutze auzotik abiatuta bizikleta martxa bat egin dute gaur goizean Oiartzunen. Helburua, herritarrak hilaren 20ean Donostian Orain presoak lamapean egitekoa den manifestaziora deitzea. Bizikletaz herria zeharkatu ondoren, Done Eztebe plazan elkartu dira, eta han herriko aurpegi ezagunak lehen ilaran, manifestua irakurri dute.
“Giza eskubideen alde egoteak batzen gaitu, eta etorkizun justu zein alaiago baten alde lanean jarraitzeko konpromisoak ere bai”, irakurri dute, segidan oiartzuar haur motxiladunek bizi duten egoera bidegabea gaitzesteko.
Gogoratu dutenez “282 preso dauden gaur egun euren senideengandik ehunka edo milaka kilometrora” eta preso horiei guztiei “oraindik ere Espainiako zein Europako legedien aurkakoa diren salbuespen neurriak” ezartzen zaizkiela salatu dute.
“Bakean eta adiskidetuta bizi den jendarte batekin amesten” dutela adierazi, eta “adiskidetze prozesua urratsez urrats eraikitzea hastea” beharrezkotzat jo dute. Norabide horretan, “egungo espetxe politika aldetzea ezinbestekotzat jo” dute, eta nabarmendu dute aldaketa hori lortzeko “beharrezkoa dela guztion bultzada eta konpromisoa”.
“Euskal Herrian benetako bake eta elkarrizketa lortzeko, euskal preso eta iheslarien auziari irtenbidea ematea ezinbestekoa da” adierazi dute eta lau lehentasun zehaztu dituzte: urruntzea, larriki gaixo dauden presoen askatasuna, Espainiako eta Frantziako estatuen zigorren batuketen aplikazioa, eta salbuespeneko neurria den heinean, lehen graduaren aldaketa.
“Korapiloak askatzeko garaia da orain”, esan dute eta “urriaren 20an Oiartzungo kaleak hutsik utzi eta Donostiako kaleak” betetzera deitu dituzte herritarrak.
