[Galeria] Euskaraz, eta kantari hartu dute plaza

Euskaraldiaren bezperetan, herriko plazak hartu dituzte Orereta Ikastolako eta Lapurdiko Biriatu, Hendaia, Urruña eta Ziburuko Kaskarotenea Ikastoletako 1.300 ikaslek.

Ikerne Zarate Gartziarena

Errenteria-Orereta

2018/11/19

Izan kantuz iniziatiba egin dute Orereta Ikastolak eta Lapurdiko, Hendaia, Ziburu, Urruña eta Biriatuko ikastolek Euskaraldiaren harira.

Euskaraldiaren bezperetan, herriko plazak hartu dituzte Orereta Ikastolako eta Lapurdiko Biriatu, Hendaia, Urruña eta Ziburuko Kaskarotenea Ikastoletako 1.300 ikaslek. Kantuz hartu gainera, Izan Kantuz iniziatibarekin. Herriko zazpi plazetan ibili dira lehenik kantuan, eta eguerdian, 1.300 ikasleak Koldo Mitxelena plazan bildu dira Hartu kontrola, aukeratu rola kanta abestu eta dantzatzera. Haur eta gazteek koloreztatu egin dute Koldo Mitxelena plaza, eskutan zituzten koloretako zapiekin. Bost ikastolek elkarlanean sortu zuten Zubiak eraikiz iniziatibaren barruan egin dute gaurko ekintza: “Muga administratiboez gaindi, ikastolen, irakasleen zein ikasleen arteko harremanak sortu eta indartzea, eta Ipar Euskal Herriko ikastolei sustengua eskaintzea dugu helburu, besteak beste”. Euskaraldia, ahobizi eta belarriprestetatik harago, euskaldunak elkartzeko ariketa ere badela nabarmendu dute Izan kantuz ekintzaren arduradunek, eta bost ikastolek Euskaraldiarekin bat egingo dutela esan dute: “Gaurko ekintzaren bidez, errespetuz eta adeitasunez euskara erabiliz herri bat osatzen dugula erakutsi dugu”.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.