Gaurtik hasita ostiralera bitartean izango dira greban eta elkarretaratzeak egingo dituzte Errenteria-Oreretan, Irunen eta Donostian.
ELAren elkarretaratzea joan den hilean erresidentzietan egindako grebaren harira.
Negoziazioetan urratsik aurrera egin ez dutela eta bost eguneko grebara deitu dut ELA sindikatuak Gipuzkoako erresidentzietan. Gaurtik hasita, ostiralera bitartera deitu du grebara, eta gogor salatu du Adegi, Garen, lares, eta Matia 2020 patronalen jarrera, “2017 eta 2018rako soldatak izoztea planteatzen jarraitzen dute urratsik egin gabe negoziaketan”. Gipuzkoako Foru Aldundiari berriz, ez posizionatzea egotzi dio zerbitzuaren arduradun zuzena izanik.
Mahaian gehiengo ordezkaritza izanik duela b i urte Gipuzkoako Adinekoen Egoitzetako, eguneko zentroetako eta pisu tutelatuetako langileen baldintzak hobetuko zituen proposamena aurkeztu zuela azaldu du sindikatuak. Patronalaren estrategia, berriz, denbora pasatzen uztea izan dela erantsi du, “azkeneko mahai sektorialean egindako proposamenak hutsaren hurrena izan dira”.
ELAk gutxiengoak ezarri ditu:”2017 eta 2018rako soldata igoerak jaso behar ditu akordioak, eta hola ez, sektoreko hitzarmen hori jasota geratu behar da enpresetan”.
Negoziazioaren egoera onartezintzat jo du sindikatuak eta “erantzun serioak” eskatu dizkiete aldundiari zein patronalari. Langileen aldarrikapen nagusiak honakoak dira: hobekuntza ekonomikoak eta horien barruan soldata igoera eta plusen igoerak; 20 minutuko atsedenaldi ordainduak; lanaldien normalizazioa; ratioen hobekuntza zerbitzuen kalitatea bera bermatuz, norberaren zereginetarako egunak; gaixo egoteagatik penalizaziorik ez jasotzea; edota 60 urtetik gorako langileentzat erraztasunak, hobekuntza sozialak, besteak beste.
Sektore feminizatua
Zaintzaren sektore feminizatua dela nabarmendu du ELA sindikatuak eta erresidentzien gatazkaren erdigunean sektore feminizatu baten duintasuna dagoela ekarri du gogora, “soldata arrakala ezabatzeko bidea luzea da, eta erakunde publikoek horretan urratsak egin nahi badituzte, orain da momentua”. Bitartean, zaintza lanak erdigunera eramateko jarraituko duela jakinarazi du.
Grebarekin bat egitera deitu dituzte erresidentziako langileak, azkenik, baita eskualdeka deitutako mobilizazioetara joateko ere. Gaur bertan elkarretaratzea egingo dute Donostiako Intxaurrondo auzoko Txara 1 egoitzaren aurrean 11:30ean; bihar Errenteria-Oreretako Biharko Eguneko Zentroan (Olibet auzoa) izango da protesta; asteazkenean (hilak 28) Irungo Colon pasealekuan izango da eta, ostegunean, berriz, Errenteria-Oreretako Sanmarkoxsene egoitza aurrean. Ostiralean egingo dute azken elkarretaratzea Gipuzkoako Foru Aldundiaren egoitzaren aurrean. Elkarretaratze guztiak 11:30ean izango dira.
