Euskararen Eguna larunbatean ospatuko dute Trintxerpen eta Donibanen

Bertso bazkaria eta erromeria Trintxerpen, eta bazkaria eta kantaldia Donibanen

olatz mitxelena

2018/11/27

Iazko Euskararen Egunean, Antxok, haurrak dantzan.

Euskararen Egunean bukatuko da Euskaraldia, abenduaren 3an. Ospakizuna, baina, astelehenarekin egokitu da aurten, eta ziurrenik horregatik, Pasaian, larunbatera aurreratu dituzte Euskararen Eguneko ospakizunak. Trintxerpen Korkoiburuek antolatu dute jaia bigarren urtez jarraian, herriko beste eragileekin elkarlanean. Ospakizun nagusiak, Maddi Ane Txoperenak eta Maider Arregik girotutako bertso bazkaria, baita ondorengo erromeria ere, Zirizan izango dira, baina badira ekitaldi gehiago, tartetan bazkariaren aurretik haurrentzako antolatutako haur jolasak, Gernika plazan. Boveda eta Ekaitza taldeek antolatuta, 12:30etik 13:30era. Trintxerpeko bertso bazkarirako txartelak erosteko azken eguna gaur da. Trintxer tabernan eros daitezke, 18 euroan helduen txartela eta 8 euroan haurrena. Azken hauentzat xolomoa, patatak, kroketak eta postrea aukeran, eta helduentzat, berriz, sagardotegi menua. Egun berean izango da ospakizuna Donibanen, kasu honetan, Bixi-Bixi elkarteak antolatuta. Bazkaria eta kantaldia antolatu dituzte, elkartearen egoitzan, 14:00etatik aurrera, Ibarla taldearekin. Txartelak Berezi okindegian, Xabiker harategian eta Itziar tabernan eros daitezke, 15 euroan helduentzat, 8 euro gazteentzat eta 5 euroan haurrentzat.Telefonoz ere eska daitezke, 667 722 144 telefonora deituta.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.