Kirola eta ongi pasatzea uztartuko dituzte Ficoban
Feel Fitness Experience ekitaldia egingo dute asteburuan, Irungo Ficoba erakustazokan. Larunbat eta igandean, hainbat monitorek gidatutako 70 kirol ekitaldi egiteko aukera izango dute hara hurbiltzen direnek. Horretara moldatutako azpiegitura jarriko dute, eta hala, hiru agertoki izango dira, 18.000 kilowatteko soinuarekin. Ekitaldi horien artean hainbat masterclass, maratoi, workshop eta hitzaldiak izango dira eta indoor bizikleta, aerobika, step… kirolak landuko dituzte. Ekintzak profesional zein afizionatuei eta heldu zein gazteei zuzenduta daude.
Oinarrizko sarrerak 5 euro balio du. Horrek aukera ematen du Ficoban sartu eta doako ekintzetan nahiz hitzaldietan parte hartzeko. Ekintza zehatzen batean parte hartzeko gehiago ordaindu beharko da. Sarrerak erosi eta prezioak ikusteko www.feelfitness.es edo www.kirolprobak.com webguneak bisita daitezke. Bestela, Ficoban bertan edo Deskontalian.
Horrez gain, beste zenbait ekintza izango dira: umeentzako gunea Txikipark eta Txirri, Mirri eta Txiribitonen emanaldiarekin (igandean, 16:00etan), shopping center, taberna…
Ekimena Feel Fitness Euskadi elkarteak antolatu du, eta elkarte horren asmoa kirola bultzatzeaz gain, ohitura osasungarriak sustatzea da.
