M18 Plazara, presoen "salbuespen egoera" salatzeko eguna, bihar

oarso bidasoko hitza

Oarsoaldea

2013/05/17

Irudia iazkoa da, Oiartzungoa

Urte hasieran Bilbon sortutako olatu erraldoiari eutsi eta Euskal Herri osoko plazak euskal preso eta iheslarien eskubideen aldeko aldarriarekin betetzea du helburu, bihar, Herrira-k, eta aldi berean, presoen kontrako «salbuespen neurriak» salatuko dituzte M18 Plazara ekimenaren bitartez. Aldarrikapen horiek Oarsoaldeko eta Bidasoko udalerrietara ere helduko dira, eta bertako herri bilguneetatik dei egin dute antolatutako ekimenetan parte hartzera, «euskal preso eta iheslarien eskubideen aldeko aldarria egin, eta Frantziako zein Espainiako gobernuei urratsak eman ditzaten eskatzeko». Beheko zerrendan daude herriz herri egingo direnak. «Urteetan eta sufrimenduan» gehiegi luzatu den gatazka egoera atzean utzi eta «bake egoera justua» eraikitzeko aukera berriak zabalik direla esan du Herrira-k: «Konponbidean aurrera egiteko, gatazkaren ondorioz preso eta erbestean daudenengan arreta jartzea beharrezkoa izango da», eta bide horretan euskal presoei dagozkien oinarrizko giza eskubideen errespetua kokatu du lehen urrats gisa. Horren harira, plazaz plaza euskal presoen Euskal Herriratzea; gaixotasun larriak dituztenak libre uztea; espetxe zigorren luzatzearekin amaitu edo bizi osorako zigorra suposatzen duten neurrien derogazioa, eta pertsona gisa preso eta erbesteratuei dagozkien eskubide guztien errespetua galdegingo du bihar, plazetan, Herrira-k.

Biharko mobilizazioak, herriz herri

Pasaia

Antxo. 12:30etik aurrera ekitaldia egingo dute Gure Zumardian.
Donibane. 11:30ean, haur jolasak eta tailerrak egingo dituzte plazan; ordu berean, herritarren arteko esku pilota partidak plazan; 12:30ean, Pari Berri taldeko beteranoen eta gazteen arteko areto futbol partidak plazan; 13:00etan, presoen aldeko koplak plazan; 13:30ean, mosaikoa egingo dute plazan, eta ondoren, sardina jatea.
San Pedro-Trintxerpe. San Pedroko pilotalekuan egingo dituzte ekimenak. Honakoak dira: 12:00etatik 13:00etara, San Pedrotik zehar fanfarre poteoa egingo dute; 13:00etatik aurrera, ekitaldia egingo dute, tartean, herri argazkia eta pintxo potea, 1,5 euroan.

Irun

12:00etan. Zabaltza plazan mosaikoa egiteko asmoa dute. Joan den urtekoa hobetzeko herritarrak animatu ditu Irungo Herrira-k.

Hondarribia

12:00etan. Amutetik bizikleta martxa abiatuko da, eta herritik zehar bira eman ondoren, 13:00ak aldera Kai Zaharrera iritsiko da martxa.
12:30ean. Oinezkoen martxa San Pedro kaletik Kai Zaharrerantz abiatuko da.
13:30ean. Kai Zaharrean ekitaldia eta argazki erraldoia egingo dute.
14:30ean. Herri bazkaria Santiago kalean, paella erraldoiarekin. Txartelak Muaran lor daitezke, 18 euroan.

Errenteria-Orereta

11:45ean. Hiru zutabeko martxa abiatuko dute Santa Klara plazatik, Alabergako biribilgunetik eta Katalunia biribilgunetik. Bakoitzak aldarrikapen bat izango du.
12:00etan. Hiru zutabeak Koldo Mitxelena plazan elkartuko dira eta bertan hainbat gune izango dira.
13:00etan. Argazki erraldoia egingo dute.

Oiartzun

09:00-21:00. Doneztebe plazan espetxe bateko patioa irudikatuko dute. 30 minutuko txandetan oinez ibiliko dira oiartzuarrak, sakabanatuta dauden presoak bisitatzeko egin behar diren kilometroak irudikatzeko.
11:00etan. Espetxeetan egiten diren tailerrak irudikatuko dituzte.
12:00etan. Elkarretaratzea Doneztebe plazan.
14:00etan. Herri bazkaria egingo dute. Txartelak ohiko tokietan salgai, bost euroan.
19:00etan. Preso ohiek sakabanaketa politikaren gaineko hitzaldia emango dute.
20:00etan. Elkarretaratzea Doneztebe plazan.

Lezo

11:30etik aurrera. Herriko plazan egingo dituzte ekimenak; eguraldi txarrarekin, Saldise plazan. Argazki erraldoia aterako dute lehenik, eta horren ondoren ekitaldia egingo dute egunerako prestatu den agiria irakurriz eta herritarrei hainbat eskaera eginez. Ondoren hamaiketakoa egingo dute. Mendekoste jaien egitarauaren barruan daude ekimen horiek guztiak.

Hendaia-Pausu-Biriatu Hendaian, Pausun eta Biriatun ez da ekitaldirik egingo, bai ordea Donibane Lohizunen eta Urruñan.

Donibane Lohizune. 11:00etan, Luis XIV plazatik martxa urdina Zokoaraino; 13:00etan, pintxoak Zokoan.
Urruña. 12:00etan, Frontoi plazan, argazki ikusgarria; 13:00etan, Berttoli elkartean, luntxa.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.