
Ficobako etxolen muntaia
San Pedro eta San Martzial jaietan dagoen berritasunetako bat da bide publikoan jartzen dituzten postuen tokiaren aldaketa. Orain arte hiriko erdiguneko kale nagusietan jartzen ziren postu horiek, baina aurten, Ficoba ondoan jarriko dituzte. Gainera, etxola batzuk utziko dizkiete postuak jarriko dituztenei.
Denera 24 egurrezko etxola jartzea aurreikusi du udalak (irudikoak bezalakoak), hiru metro luze eta bi zabalekoak. Hala, postu horiek hilaren 21ean zabalduko dituzte, uztailaren 2ra arte. “Formatu berri honek aukera emango digu postu horiek era ordenatuagoan jartzeko, herritarrentzako eskurago egon daitezen. Hiriaren irudia ere hobetuko dute, eta gainera, toki zabalago batean jarriko dira”, azaldu du Belen Sierra Irungo Udaleko Kultura ordezkariak.