Bidasoak merezita irabazi du lehen partida
Asobal Ligako hamargarren lehian irabazi du sasoiko lehen partida Bidasoa-Irun taldeak. Asko sufritzen, baina bi puntuak zakura. 25-24 gainditu zuten horiek Villa de Aranda taldea, azken segundoetan Crowleyk penaltiz sartutako gol bati esker. Artalekuko 2.000 zaleek lasaitu ederra hartu zuten markagailuko txirrinak jo zuenean, partidaren 60 minutuak bukatu zirela adierazten zuen txirrina entzutean.
Eta eragin bikoitza izan du garaipenak: bat, nabarmenena, bi puntu horiek batuta azken postua utzi dutela irundarrek. Bigarrena, animoena: lehen garaipena lortuta gora bestetik ezin du egin Bidasoak mailari eusteko bidean.
Baina ez pentsa erraza izan zenik larunbateko garaipena. Ia partida osoan atzetik joan ziren markagailuan Fernando Boleak entrenatutakoak, eta bigarren zatian, esaterako, hiru gol behetik ere ibili ziren. Baina Bidasoak sasoian zerbait azaldu badu, hori da kasta eta borrokarako grina badutela jokalariek, eta partida galduta eman beharrean, defentsan estutu eta erasoan finago aritu ziren. Horra garaipenaren gakoak. Eta beste datu bat: Bidasoak azken bi fitxaketekin asmatu du, Alvarezek, esaterako, zortzi gol sartu zituelako.
