'Ocean Marlin' uretaratu dute Donibanen

olatz mitxelena

Pasaia

2014/01/31

: ‘Ocean Marlin’

Pasai Donibaneko Zamakona ontziolan Ocean Marlin itsasontzia uretaratu dute gaur arratsaldean. Ikusmin handia sortu du uretaratzeak herritarren artean, eta 17:00etarako minutu gutxi falta zirela, kurioso mordoa pilaturik zegoen ontziolaren inguruetan. txalo artean uretaratu dute, arazorik gabe, Facal atoiontzien laguntzaz. Ocean Marlin Zamakonan uretaratzen duten mota honetako bigarren ontzia da. Lehengoa, honen bikia, eta Ocean Ospray izenekoa, pasa den abuztuan uretaratu zuten. Ontziolan bertan zegoen Ocean Ospray, margotu berri eta dotore, bere anaia bikiaren uretaratzearen lekuko. Bertatik ikusi dute askok uretaratzea. Bi ontziak Norvegiako Atlantic Offshore A.S. armadorearekin hitzartutakoak dira, eta Zamakonan hirugarren bat dute egiteko. Larrialdietarako ontziak Petrolio plataformetan sor daitezkeen larrialdi egoeretan erantzuna ematea izango da Pasaian gaur uretaratu duten ontziaren egitekoa, eta hori dela eta Iparreko Itsasoan eman daitezken baldintza klimatologiko gogorretan aritzeko bereziki prestatutako ontzia da. Aurtengo bigarren seihilekoan hasiko da lanean, Ipar Itsasoan, Total deritzan petrolio konpainiaren zerbitzura. Pasaian eraiki duten ontzia Field Support Vessel bat da. 25 milioi euro balio du eta teknologia aurreratuenarekin hornituta dago. Atoian 65 tona garraiatzeko ahalmena du, eta 300 lagun erreskatatzekoa. Esloran 66,80 metro ditu eta zabaleran 16.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.