Xakeko lehen taldeak aurrekoekiko tartea murriztu du eta hobetzen jarraitu nahi du azken jardunaldian
Gipuzkoako xake ligako Ohoreko Mailako Hondarribia-Markaxka A taldeak 1-3 irabazi zuen larunbatean Arrasaten. Laugarren postuan segitzen dute baina bigarrena bi puntura dute. Azken jardunaldian posturen bat igotzen saiatuko dira baina zaila izango dute. Lehen Mailan jaitsierako bi postuak erabakiko dira eta hautagaien artean Marlaxka B dago.
Gipuzkoako xake ligako Ohoreko Mailan dagoen Hondarribia-Markaxka A taldeak 1-3 irabazi zuen larunbatean Arrasaten Arlutz B taldearen aurka eta aurreko taldeekiko tartea murriztea lortu du. Laugarren postuan segitzen dute baina orain liderra lau puntu eta erdira dago eta bigarren bi puntura. Anaitasuna Kakutek 2,5 puntu ateratzen dizkio Iriondori eta ia ziurtzat eman daiteke Euskal Ligara igoko dela.
Azken jardunaldian posturen bat irabaztea zaila du Hondarribiko lehen taldeak. Bigarren Iriondoren kontra jokatuko dute eta haiekin berdintzeko 3-1 irabazi beharko lukete hondarribiarrek. Emaitza hori hobetuz gero, hirugarren dagoen Eibar ere aurreratu dezakete eta bigarren posturaino igo, baina horretarako Iriondoren gainetik pasatu beharko luke Marlaxkak eta Eibarrek hamargarrenaren kontra huts egin. Ezinezkoa ez, baina ia.
Lehen Mailako taldea larri
Lehen Mailan Marlaxka B-k 4-0 galdu zuen Grosen eta sailkapenean lau postu galdu ditu. Gainera, azken jardunaldia liderrarekin jokatuko du eta, larunbateko emaitza hobetu beharko du ezustekorik ez badute nahi. Hiru talde ditu Marlaxka Bk atzetik eta bi jaitsiko dira Bigarren Mailara. Marlaxkak 18,5 puntu ditu, Idiazabal A-k18, eta Fortuna A-k eta Idiazabal B-k 17.
Azkenak bosgarrenaren kontra jokatuko du eta beste biek elkarren artean. Fortunak irabaziko balu, Idiazabal ordezkaririk gabe geratu daiteke Lehen Mailan, baina gauza asko gerta litezke, azken jardunaldian sei taldek behintzat izango baitute atzean jaitsieraren mamua. Arlutz C taldea zazpigarren tokian dago, 19 punturekin, azkenak baino 2 puntu gehiago —lehia bakoitzean 4 partida jokatzen dira eta bakoitzak puntu bat zenbatzen du—.
Kanporaketa lasaiak
Marlaxkako beste bi taldeak eroso daude sailkapenean. Biek 2na egin dute asteburuan eta denboraldiko azken jardunaldia presiorik gabe bukatuko dutela dirudi. Bigarren mailan jaitsiera fasea ari da jokatzen Marlaxka C eta aurten bi talde jaitsiko dira bakarrik —Euskal Ligatik ez delako talde gipuzkoarrik jaitsi— eta Marlaxka dagoeneko salbu dago, azken bigarrenak eta azken hirugarrenak elkarren artean jokatuko dutelako eta, Marlaxkak 4-0 galduko balu ere, biek ezingo lukete Hondarribiko taldea gainditu.
Eta Hirugarren Mailan, Marlaxka E-k 2-2 berdindu zuen Getarian, Ketarekin. Igoera fasea jokatzen ari dira Marlaxkakoak nahiz eta igotzeko aukerarik ez duten. Klubeko gazteek osatzen dute Marlaxka E eta haientzako igoera fasea jokatzeko saria izan da, denboraldia luzatzeko eta ligan eskarmentua hartzen jarraitzeko aukera izan dutelako.
