IATn akordiorik ez
Akordiorako oinarria sinatu ondoren, atzera egin du zuzendaritzak, “baldintza berri bat” zegoela argudiatuta
Xabier Martin / Berria Irun eta Urnietako IAT zentroen lan gatazka sugetzar bihurtu da aspaldian aldeen arteko konponezinak eraginda, baina atzokoak aparteko neurria hartu zuen, bederatzi hilabete pasatxoko greba etetera zihoazela ezustean atzera egin zuelako zuzendaritzak. “Batzordeak beste baldintza bat jarri du, eta ezinezkoa izan da aurreko eguneko akordio oinarria sinatzea”, esan zuen atzo TUV Rheinland Ibericako zuzendaritzak. “Batzordeak ez du seriotasunik, eta erakutsi du ez duela benetako borondaterik akordio bat egiteko”. Oso bestelako azalpena eman zion gertatutakoari batzordeko presidente Ketxus San Emeteriok. “Ez dute konpromisorik hartu nahi ituna betetzeko bermeekin. Atzo [herenegun] ez zegoen arazorik, eta gaur [atzo] bai”. Batzordeak 16:00etan deitua zuen prentsaurrekoa, akordioaren xehetasunak azaltzeko eta astelehenean lanera itzuliko zirela esateko. Azken unean bertan behera geratu zen, ordea. Precon berretsi behar zen akordioari uko egitea erabaki zuen zuzendaritzak ezustean. “Gatazkak jarraitu behar badu, jarraitzeko prest gaude”, esan zion BERRIAri San Emeteriok. Enpresak ez zuen nahi akordioa lan itun gisa erregistratu, ez zuelako nahi “Espainia osoan” ikustea akordio hori posible zela; Precon soluzio bat eskaini zioten: lan hitzarmen gisa ez, baina Precoren arbitratze ebazpen gisa jasoko zen akordioa. TUV Rheinlanden zuzendaritzak baiezkoa eman zion aukera horri hasieran, harik eta atzo iritziz aldatu zuen arte. Presazko bilera bat egin zuten aldeek atzo, baina emaitzarik gabe, eta gaur berriro elkartuko dira, asteazkenean adostutakoari behin betikotasun izaera emateko gai diren ikusteko. Batzordeak lan erreformaren zati kaltegarrienaz blindatzea du helburu, eta argi utzi du hori lortu arte grebarekin jarraituko duela. Urnietako IAT zentroak itxita jarraituko du, beraz.
