Ingurumenaren aldeko politikan Pasaiak egindako urratsak txalotu ditu Eguzkik
Zintzilikarioak puskatu izana salatu du Eguzkik eta erasotutako zinegotziari elkartasuna adierazi dio.
Pasaian gaur hasiko dira hondakinak atez ate biltzen San Pedron eta Trintxerpen, eta Eguzki talde ekologistak, data baliatu nahi izan du Pasaiak ingurumenaren aldeko politiketan egindako urratsak txalotzeko. Atez atekoaren aldeko apustua egitea “erabaki ausarta” izan dela iritzi dio Eguzkik, eta herritarrei birziklapena laguntzeko eskatu die, atez atekoan modu aktiboan parte hartuz. Bide batez, azken asteetan izan diren erasoak salatu ditu Eguzkik, eta erasotutako zinegotziari elkartasuna adierazi dio.
“Pertsona eta kolektibo aurrerakoi ororen kontzientzi aktibatzera deitzen dugu Trintxerpen eta San Pedron hondakinak atez ate biltzeko sistemaren ezarpena laguntzeko”, esan du talde ekologistak. Atez atekoa “garbiagoa, ekonomikoagoa, erosoagoa eta eraginkorragoa” dela iritzi dio Eguzkik eta horregatik, Pasaiako Udalari herritarrak informatzeko eta sentsibilizatzeko lanean jarrai dezala eskatu dio.
