Musika eskoletako 2.500 ikasle bilduko ditu Musikaldiak maiatzean
Euskal Herriko Musika Eskolen Elkartearen baitan biltzen diren eskoletako 2.500 ikaslek hartuko dute parte maiatzaren 9an, Errenteria-Oreretan egingo duten Musikaldiaren XII. ekitaldian. Eurez gain, udalerriko musika eragileek ere ekitaldiak egingo dituzte.
Musikaldiaren hamabigarren ekitaldia ospatuko dute maiatzaren 9an Errenteria-Oreretan. Bertan, Euskal Herriko Musika Eskolen Elkartearen baitan biltzen diren eskoletako 2.500 ikaslek hartuko dute parte. Jaialdi hori bi urtez behin antolatzen dute, Euskal Autonomia Erkidegoko herri batean.
Gaur egin dute ekitaldiaren aurkezpena. Julen Mendoza alkateak adierazi duenez, horrelako ekitaldi “garrantzitsu” bat Errenteria-Oreretan antolatzea “harro egoteko modukoa da”. Bere ustez, Errenteria Musikaleko ikasleentzako “erakusleiho ezin hobea” izango da Musikaldia. Gogorarazi duenez, egun 900 ikasle dituzte, hainbat taldetan banatuta.
Bestalde, Errenteria-Oreretak kultura arloan “ahalmen handia” duela erakusten duela nabarmendu du Mendozak, eta hainbat eragile ari direla musika lantzen. Iragarri du eurekin bilera egingo dute urtarrilean, maiatzaren 9ko egitaraua biribiltzeko asmoz. Azkenik, Musikaldiak musikarien senide asko erakarriko ditu udalerrira, eta “ostalaritzak eta komertzioak eskertuko dutela uste dut”.
Jaialdiak, hiru zati
Errenteria Musikaleko zuzendari Begoña Lasartek egitarauaren xehetasunak eman ditu. Horrela, hiru partetan banatuko dute jaialdia. Lehenik eta behin, goizean, Errenteria-Oreretako hainbat puntutan —kalean gehienbat, baina estalpean ere— joko dute. “Gune batzuk finkatuko ditugu, musika mota ezberdinekin”, azaldu du Lasartek. 19:00etatik aurrera, herriko musika eragileek zehazteke dauden hainbat jarduera antolatuko dituzte.
Tartean, berriz, Anoeta estadiora joango dira musikariak. Izan ere, Donostia 2016 hiriburutzaren baitako ekitaldia antolatu dutela jakinarazi du Mikel Mate Donostiako Udal Musika Eskolako zuzendariak. “26 estatutatik etorritako musikariek joko dute Anoetan, eta tartean egongo dira Nafarroako musika eskolek Tafallan egingo duten topaketan parte hartzen dutenek”, adierazi du. Ekitaldiaren helburua “herritarrak musikaz bizitzea” dela jakinarazi du.
Tonuan jarri
Aurkezpenaren bukaerarako utzi dute ekitaldiaren logoaren berri ematea. Irune Balenziagak aurkeztu du: Tonuan jarri izango da leloa. Kultura zinegotziaren arabera, “esaldi hori asko erabiltzen dute musikariek, eta, egun horretan bertan, elkar ezagutzen ez duten musikari askok joko dute”. Gainera, leloa zein logoa “alaia eta positiboak” direla gaineratu du.
Musikaldiaren aurkezpena
