Herrera Herrirak Zirizari buruzko parte hartze prozesua abiatuko du Trintxerpen
Udalarekin elkarlanean antolatu duten prozesuan, erabilera anitzeko gunea izango dena nola kudeatu, eztabaidatuko dute; "antolamendu eta funtzionamendurako eredua" zehaztu.
Bi fasetan egingo dute parte-hartze prozesua. Lehengo fasea, proiektua sozializatzeko erabiliko dute, “Ziriza zer den eta zer ordezkatzen duen” jakinaraziz. Bigarren fasea, zehaztapenerako fasea izango da, eta hor eztabaidatuko dituzte antolamendu eta kudeaketa eredua. Prozesua mundu guztiari zabalik dela nabarmendu zuten Herrera Herrirako ordezkariek lehengo ostiralean egin zuten aurkezpenean, eta parte-hartzera deitu.
Proiektuaren lehen fasea ostegunean hasi eta urtarrilaren 29an bukatuko da. Lehengo zita, ostegunean dute (hilak 18), 19:30ean, alkateordetzan. Ondoren Eguberrietako etena egin eta urtarrilean ostegunero bilduko dira, ordu eta toki berean. Lehen batzarrean kirol talde eta elkarteekin bilduko direla jakinarazi zuten, baina, argi utziz batzar guztiak irekiak direla. Printzipioz beraiek sektoreka antolatu dituzte sentsibilizazio fasearen barruko batzarrak, baina, ez dira bilera itxiak eta edonork har dezake parte hobekien datorkion datan.
Bigarren fasean otsailaren 7an hasi eta eta martxoaren 14an bukatuko da, eta tarte horretan beste bizpahiru saio aurreikusi dituzte. Bigarren fasean Gernikako Astra bisitatuko dute, “eraiki nahi duten eredurako erreferentea delako”. Beste barrutietako errealitateetara gerturatzeko saiakera egingo dutela ere iragarri zuten.