Lehenbiziko bi oihalak josi ditu gaur herriko Gure Esku Dagok
Hainbat sektoretako aurpegi ezagunek ekainean eraikiko den hautestontzi erraldoirako lehenbiziko bi oihalak josi dituzte Niessen aretoan; herrian beste 78 josi behar dira ekaina bitartean; joste eguna ekainaren 6an izango da.
Aurpegi ezagun asko bildu da gaur eguerdian Errenteria-Oreretako Niessen Aretoan. Jostunak dokumentalaren estreinaldia antolatua zuen gaurko Errenteria-Oreretako Gure Esku Dagok, eta arazo teknikoak tarteko emanaldia beste egun baterako atzeratu egin behar izan duten arren, zita herriko dinamikaren berri emateko baliatu dute antolatzaileek. Ekainerako josi behar diren 80 ohiletatik lehenbiziko biak josi dituzte ekitaldian, aretora bildu diren lagunen laguntzaz, oihalak pertsonalizatuz, eta horiek nola osatu behar diren irudikatuz. Bide batez, ekainaren 6an joste eguna antolatuko duela iragarri du Gure Esku Dagok, herriko oihalak Donostiara eraman aurreko urrats gisa. 
