Izotza enpresako langileek grebara joatea erabaki dute
Datorren asteko astelehenean eta asteazkenean egingo dute greba eta gatazka konpondu ezean otsailaren 2tik aurrera greba mugagabean sartuko lirateke.
Langileek enpresako zuzendaritza 2012an agortu zen enpresa-hitzarmena berriro negoziatzeko mahaian esertzea lortu nahi dute grebaren bidez. Azken bi urtetan negoziazioa lortzeko saiakera ugari egin dituztela jakinarazi dute langileek eta saiakera guztiak porrot egin dutela aurreratu, “zuzendaritzak uko egiten diolako mahai baten bueltan langileekin esertzeari eta ondorioz muzin hitzarmena berritzeari”. Langileek nabarmendu nahi izan dute enpresaren bilakaera ekonomikoa ona izan dela azken urtetan.
Gauzak honela, bi greba egun deitu dituzte datorren asterako. Astelehen eta asteazkenena egingo dute greba, (hilak 26 eta 28), eta ordubeteko elkarretaratzeak egingo dituzte bi egunetan enpresaren atarian, 10:00etatik 11:00etara. Gauzak konpondu ezean, otsailaren 2tik aurrera greba mugagabea deituko dutela ohartarazi dute langileek.
Pasaiako Izotza enpresako langileek mobilizazioetara jo ondoren lortu zuten azken enpresa hitzarmena. Langileek gogoratu dute orduan beste pertsona bat zela kofradiako buru, baina aldaketa ez omen da izan langileen onurarako. “Orain arte ikusitakoarekin, kofradiako lehendakari berria aurrekoak zuen jarrera bera edo okerragoa duela esan dezakegu”, kexatu dira.
Enpresako bezeroei, berriz, beren erabakia ulertzeko eskatu diete langileek: “Gure asmoa ez da eurak kaltetzea” esan dute, eta zera gaineratu: “Soilik ulertu arazi nahi dugu, pausu hau ematen badugu zuzendaritzak beste aukerarik ez digulako dela”.
