Oarsoaldea Txirrindularitza Eskola sortu dute, gazteei formazio osoa emateko
Otsailean hasiko dituzte eskolak, eta izena emateko aukera zabalik dago, 50 euroan. 12-16 adin tarteko gazteei bideratuta dago egitasmoa, txirrindularitzaren modalitate guztiak ezagutu ditzaten. Egitasmoak ez du lehia bokaziorik.
Otsailean abiatuko da Oarsoaldeko Txirrindaritza Eskola, Otxe. Egitasmoaren helburua da 12-16 adin tarteko gazteek txirrindularitzaren gaineko formazio integral edo osoa izatea, bizikleta modalitate ezberdinak ezagutuz, mekanika landuz, edo teknika jorratuz, fase ezberdinetan. Gerora, gazte horiek gustuko duten modalitatean sakontzeko aukera izango dute: pista, BMX, errepidea, eta BTT dira modalitate horiek. Otsailetik ekainera landuko dituzte modalitateak, astean bi saio eginaz, 18:00etatik 20:00etara. Eskualdeko nahiz kanpoko gazteak apunta daitezke.
Atzo egin zuten kirol egitasmoaren aurkezpena Oiartzungo udaletxean. Bertan Arkaitz Iza Otxeko kideak azaldu zuenez, gabezia edo hutsune batetik abiatuta, diagnostikoa egin eta horren araberako egitasmoa da Otxe, «txirrindularitza eskola da, ez da lehiarako klub bat izango. Egitasmo aitzindari eta pilotua da Euskal Herri mailan».
Otxek erakundeen eta txirrindularitzarekin harremana duten eragileen babesa dute, horien artean Oarsoaldeko lau udalena —atzoko aurkezpenean Aiora Perez de San Roman Oiartzungo alkatea egon zen—, Gipuzkoako Foru Aldundiarena, eta Gipuzkoako nahiz Euskadiko txirrindularitza federazioena. «Eskerrak eman nahi dizkiegu Pasaia, Lezo, Errenteria eta Oiartzungo udalei laguntzagatik, baita beste erakundeei ere. Haiek gabe ezinezko litzateke hau aurrera ateratzea», esan zuen atzo Izak.
Izena emateko aukera dago
Aurten, otsailetik ekaina bukaerara egingo dituzte eskolaren barruko jarduerak. Baina Otxeren helburua da aurrera begira iraila-ekaina bitartean ematea eskolak. Aurtengoetan izena emateko aukera dago jada, 50 euroren truke. Izena emateko eskuorriak Oarsoaldeko kiroldegi guztietan daude.
Horren harira, otsailaren 2an (astelehena), 18:00etan eta taldeak Errenteria-Oreretako Alaberga kaleko 4. zenbakian duen lokalean informazio batzarra egingo dute.
Eskolan izena eman nahi dutenek oinarrizkoa besterik ez dute behar: bizikleta eta kaskoa. Gainontzekoa Otxek emango du. Informazio gehiago Otxeren webgunean lor daiteke.
