Mankomunitateko zorrari nola erantzungo dion azaltzeko eskatu dio EAJk EH Bilduri
EAJren arabera Pasaiak 1.034.348 euro ordaindu behar ditu San Markoko Mankomunitatean, hondakinen kudeaketa "penagarriarengatik".
Kezka agertu du EAJk, Pasaiako Udalaren eta San Markoko Mankomunitatearen egoera ekonomikoarengatik. Esan dutenez, “Bilduren arduragabekeriak eta erabaki politikoek San Markos Mankomunitateak 20.400.400€ ordaintzea ekarriko dute”.
Jeltzaleen arabera errauste planta geratu izanaren eta hondakinen aferan zabaldutako ekinbide judizialak galdu izanaren ondorioa da zorra. Konsortzioan duen parte-hartzearen arabera, %30a ordaintzea dagokio mankomunitateari, eta Pasaiari, zehazki, 1.034.348 euro, beti ere EAJk zabaldutako datuen arabera.“Gertaera honek Pasaiako Udala eta Mankomunitatea egoera ekonomiko kezkagarrian” utziko dituela iritzi diote jeltzaleek, eta horregatik udal gobernuari zorrari nola aurre egingo dioten azaltzeko eskatu dute.
