Herri programa osatzeko helburuz laugarren biltzarra deitu du EH Bilduk
Antxon eta San Pedro-Trintxerpen, otsailaren 14ean izango dira herri batzarrak; otsailaren 21ean Donibanen; guztiak, 11:00etatik 13:00etara izango dira.
Herri programa osatzeko lanean ari da EH Bildu Pasaian. Koalizioak jakinarazi duenez, dagoeneko 80tik gora lagun ari dira jardun horretan, eta barruti bakoitzeko biltzar bana eratu dutela jakinarazi dute.
Zehaztu dutenez, biltzarretan parte hartzen ari direnek erabakia dute jada EH Bilduk udalean izango duen ordezkaritza nolakoa izan behar duen eta udal hauteskundeetarako zerrenda bera biltzarretan landuko dutela iragarri dute.
EH Bilduk herritar guztien ekarpenak bildu nahiko lituzke bere herri programaren osaketarako, eta hori dela eta bileretara joaterik ez dutenek proposamenak egiteko aukera izan dezaten bide berriak zabaltzeko lanean ari direla iragarri dute. Bien bitartean hala nahi dutenek sare sozialen bidez helarazi ditzakete ekarpenak.
Bide beretik laugarren biltzar erronda prest dutela iragarri dute. Otsailean egingo dituzte bilera irekiak barrutiz barruti: Antxon, otsailaren 14ean Alkartetxean eta egun beran Trintxerpe eta San Pedrokoak Ertin bilduko dira; Donibaneko batzarra, otsailaren 21ean izango da, Victor Hugo etxean. Batzar guztiak 11:00etan hasi eta 13:00ak arte luzatuko dira.
