Pasaitarrek eraiki ez diren azpiegiturak ordaindu behar dituztela salatu du PSE-EEk
EH Bilduren "alde bateko erabakiak" kritikatu dituzte sozialistek eta EAJri egungo egoera ahalbidetu izana leporatu diote
EH Bilduk eraiki ez dituen azpiegiturak, “pasaitarrek beren zergen bidez” ordainduko dituztela salatu du PSE-EEk. Sozialisten arabera Gipuzkoako Foru Aldundian zein Gipuzkoako Hondakinen Partzuergoan koalizio abertzaleak hartutako erabakiak “ondorio oso larriak” ekar ditzake, “ekonomikoak zein ingurumenekoak”.
PSE-EEren arabera, Partzuergoak hainbat banketxeren kontra jarritako demanda atzera bota dutenez, Gipuzkoako udalerriek, mankomunitateen bitartez, 68 milioi euro ordaindu beharko dituzte nahiz eta errauste planta ez eraiki. Pasaiari, San Markos Mankomunitatearen bitartez milioi bat eurotik gora ordaintzea dagokiola salatu dute sozialistek.
“Eta are okerragoa dena”, gaineratu dute, “pasaitarrek, gainontzeko gipuzkoar guztiek bezala, bi bider ordaindu beharko dute”. Izan ere, sozialisten arabera, ordaindu beharreko 68 milioi euroetatik heren bat aldundiak ordaindu behar duenez, diru hori “pasaitarrek Gipuzkoako Foru Aldundian ordaintzen duten zergetatik” ere eratorriko baita.”Honi, Pasaiako Udalak atez atekoa ezartzeagatik duen gaingastua gehitu behar zaio” deitoratu dute sozialistek.
PSE-EEren ustez, EH Bildu da “deskalabru honen arduradun gorena”, baina EAJren konplizitatea gogorarazi dute, jeltzaleek ahalbidetu zutelako Gipuzkoan EH Bildu gobernatu zezan. “Bilduk eta EAJkl beren eredu talken inguruan hitz egiten eta beren konfrontazioa antzezten duten bitartean, herritarrak dira hondamendia ordaindu behar dutenak”.
