Atzo aurkeztu zuten hilaren 22ko proba
48 ordutan agortu ziren, urte hasieran, Lezo-Jaizkibel mendi lasterketaren 350 plazak. Iazko arrakasta —antolakuntza eta kirol arlokoa— berretsi egin da aurten, beraz, proba hasi aurretik. Hilaren 22an egingo dute 14 kilometroko —1.200 metroko desnibela— mendi lehia bigarrenez, goi mailako partaideekin gainera: iazko podiumetako kirolariak bertan egongo dira, baita, besteak beste, Maite Maiora goi mailako mendi lasterkaria ere.
10:00etan hasiko da hilaren 22ko proba, Gurutze Santuaren plazatik. Berritasunetako bat da herrian zeharreko bidea, bai Jaizkibelera ateratzerakoan zein herrigunera iristerakoan, aldatu dutela Lezotarrak Lasterkari Taldeko antolatzaileek, «kirolarientzat erosoago izan dadin, eta herrian eragozpen gutxiago sor daitezen». Allerru muinoraino igo —suebaki ikusgarritik, 350 metroko gorabeherakoa—, eta herrira buelta; hori da bidea. «Herrian bakarrik ez, bidean zehar ere ikusleak egon daitezela nahiko genuke», esan dute antolatzaileek.
Atzo egin zuten probaren aurkezpena. Egunak emango duenaren ilusioz daude antolatzaileak, iazko babesa lortu dutelako —herriko komertzio, udal, nahiz 100 bat boluntarioena—, eta kanpoan ere aitortu dietelako egindako lana, aurtengo izen ematearekin adibidez, edo Kirolprobak sariarekin bestetik.
Sariak lehen hiru gizon eta emakumeei emango dizkiete, sexu bakoitzeko lehen lezoarrei bezala. Allerru bidean dagoen suebakia azkarren egiten dutenek ere garaikurra izango dute, emakume nahiz gizon. Eta beste sari bat emango dute: Maddi Fernandez bodyboarder lezoar gaztea omenduko dute eguerdian plazan.
Plazan, gainera, otorduaz gozatzeko aukera izango dute lezoarrek eta 350 parte hartzaileek.
Proba nagusirako izena eman dutenen artean, gehienak Oarso Bidasokoak dira: 350etik, 233. Gehienak, hondarribiarrak (59) eta errenteriarrak (58). Lezoarrak 38 dira orotara.
Kalu eta Markel
Markel Merino 5 urteko lezoarra da. Gaixo dago, garun paralisia du, eta errehabilitazio iraunkorra behar du. Therasuit metodoaz egin dezake aurrera, baina oso garestia da. Horrela, Markelen aldekoa izango da aurtengo haurren lasterketa (10:15ean da; izen emateak 09:30etik). Markelen Irria iniziatibarentzat izango da izen ematean lortutako dirua, baita proba nagusiko partaide bakoitzeko euro bat ere.
Eta hori bakarrik ez. Arkaitz Kalu Erice lezoarrak «erokeria» egingo du, Josu Andueza eta Iban Angulo lezoarrekin batera: Markelen alde 100 kilometroko lasterketa egingo dute, Bidasoa eta Oarsoaldetik, hilaren 21eko 19:00etan hasita. Lezo-Jaizkibelekin bat egingo dute 22an. Gainera, hilaren 28an, haur lezoarraren aldeko jaia egingo dute, arratsaldez, Lezon.
