Batukada feminista ikastaroa hasiko da aurki Pasaian, Emakumeentzako Jabekuntza Eskolak antolatuta. Aldarrikapenak plazaratzeko espazioak okupatu eta erabiltzea da, besteak beste, tailerraren helburua
Isabel Mancebo Baldaren ilustrazioa
Martxoaren 8aren atarian, ugariak dira emakumeentzako eskaintzak inguruko herri gehienetan, askotarikoak. Pasaian ere hala gertatu da. Mugimendu feministak luzatutako deialdiei, jabekuntza eskolaren eskaintza gehitu behar zaie. Kirola, harremanak, kultur aniztasuna, osasuna, neska gazteentzako rap ikastaroa, baita
batukada feminista eratzeko aukera ere, horiek dira proposamenak.
Hilaren 27an hasiko da batukada ikastaroa, eta saioak Antxoko ikastolan izango dira, gutxi gorabehera, bi astean behin, ekainaren 12ra bitartean. Guztira hamabi ordu egingo dituzte izena ematen dutenek.
Arantxa Vicedok eta Ainara Sarasketak gidatuko dute ikastaroa. Eskarmentua dute biek batukadetan, Pasaian baino lehen, Zarautzen, Donostian, Oñatin, Hernanin edo Tolosan aritu direlako zeregin horretan, gehienetan, arrakasta handiarekin.
Ekainaren 20an, sanjoanen inguruan, data bat adostu nahiko lukete ikastaroko partaideekin, «ikasitakoa kaleratzeko, eta ikastaroari emanaldi publiko batekin amaiera emateko». Edonola ere, azken hau taldeak berak erabakiko duela aurreratu du Sarasketak. Izan ere, ikastaroaren bitartez proba bat egingo dute, batukada bat sortzeko proposamena Pasaian zein harrera duen neurtzeko. Borondatea balego, baliteke orain abiatzen dena etorkizunean talde finkoa bilakatzea, eta hala balitz, iraupen luzeagoko ikastaroa planteatuko lukete.
Epairik gabeko gunea
Batukadan parte hartu ahal izateko ez da beharrezkoa aurrez musika ikasketak izatea. Erritmoa eta musika tresnen ezagutza jorratuko dituzte saioetan. «Batukadan instrumentu asko jotzen ditugu, eta tamaina guztietakoak», nabarmendu du Sarasketak, eta eskainiko dituzten ezagutzak ez direla musika esparrura mugatzen zehaztu du.
Batukadaren bitartez, emakume talde batean parte hartzeko aukera errazten diete parte hartzaileei, eta horrez gain, jabekuntzari dagozkion ikuspegiak lantzekoa: «Norbere buruarengan konfiantza, babes espazioa sortzea, espazio erosoa…».
Izan ere, batukada feminista, «epairik gabeko gunea» da. Hori nabarmendu du Sarasketak: «Guk epai eza lantzen dugu; ez epaitzea inor, eta, noski, bakoitzak norbere burua ere ez epaitzea. Ikastarora etorriko direnek gauzak gaizki egiteko prest egon behar dute».
Zentzu horretan emozioak bereziki zaintzen dituen metodologia darabiltela azaldu du: «Saio bakoitzaren hasieran emakume bakoitzak bere izena esatearekin batera, emozio bat aipatu behar du, momentu horretan nola sentitzen den adierazteko. Eskatzen diegu esateko nola dauden; triste, urduri, indartsu…, taldeak kontuan har dezan».
Emozioak zaintzeko erronda egin ondoren, hainbat dinamika erabili ohi dituzte, hainbat arlo jorratzeko: «Gorputz adierazpena, erlaxazioa, sorkuntza…. hainbat eremu lantzeko dinamikak». Luzaketak ere egiten dituzte saio guztietan, ondoren musika tresnak aukeratu eta erritmoak ikasten hasteko.
Emakumeek musika tresna ezberdinak probatzeko aukera izaten dutela argitu du Sarasketak, «erosoen zeinekin dauden proba dezaten». Edonola ere, taldea egonkortu ahala, eta kalera irteteko data bat gerturatzean instrumentuak finkatzen hasten dira. «Egokiena izaten da bakoitzak musika tresna bat edo bi bere egitea», dio Sarasketak, baina Pasaiako ikastaroan musika tresnak probatzeko arazorik ez dela izango aurreratu du.
Binomio bitxiaren gakoak
Indartsu txertatu da aspaldian gure inguruan batukaden fenomenoa, eta txertatze hori feminismoan bereziki indartsua izan dela dirudi. Horren inguruan galdetuta, Sarasketak baditu lotura bitxia azaltzeko hainbat gako: «Feminismoa edozein arlotan txertatu ahal da, oso transbertsala da, baina errazagoa da feminismora iristea musikaren bitartez, alaia eta sortzailea delako». Musikariaren iritziz, «musika emozioak sortu eta energia mugiarazten duelako» lotzen da ondo feminismoarekin batukada, horregatik, eta «gorputzak feminismorako duen garrantziagatik».
Ikusgarritasunari ere funtsezkoa deritzo Sarasketak, batukadak dakarren «kalearen okupatzeari», eta «ekintza politiko gisa ere oso indartsua» dela uste du, «erreakzio eta emozio desberdin asko sortzen dituelako».
Zentzu horretan, lehengo igandean Donostian egin zen Lilaton lasterketan bizitakoa goraipatu du. Donostiako, Zarauzko eta Tolosako batukada feministak batu ziren lasterketaren inguruan, festa eta aldarria uztartuz. «Hainbat belaunalditako emakumeak bildu ziren han, eta askok lehen aldiz jo zuten jendearen aurrean. Haientzat, bereziki, askatasun esperientzia bat izan zen», nabarmendu du. Izan ere, «emakumeoi historikoki ukatu izan zaizkigun hainbat gauza berreskuratzeko aukera» eskaintzen baitu batukada feministak.
