2014an jaiotako oiartzuarrei ongietorria emateko Atsolorra berreskuratuko da

Jaiotzaren inguruko euskal erritua da Atsolorra, eta egungo errealitatera egokituko dute; informazio saioa egingo da ere

Urko Etxebeste Petrirena

Oiartzun

2015/03/10

Hainbat herritan egioten dute Atsolorra. Irudia Hernanikoa da

Hilaren 22an (igandea), Atsolorra usadioa berreskuratuko dute Oiartzunen. Urte zehatz batean jaiotakoei ongietorria emateko euskal erritua da, kasu honetan, 2014an jaiotako 99 oiartzuarrei egingo diete ongietorria. Ekitaldia udaletxean izango da, 12:00etan hasita. Garaira egokitutako ekitaldia izango da. Udalak eta guraso talde batek hartu dute ohitura zaharra berreskuratzeko ardura. Ordubeteko ekitaldia izango da hilaren 22koa. Haur kantak, bertsolariak eta jan-edanak izango dira, ongietorria emateko hizketaldiaz gain. Izan ere, garai batean ohitura izaten zen Atsolorrera gonbidatuta zeuden emakumeek, amaberri izandakoaren etxera jakiak eta edariak eramatea. Hortaz, ekitaldian parte hartuko duten gurasoei etxetik jateko edo edateko zer edo zer eramateko eskatu diete. Ekitaldira iaz jaiotako haur oiartzuar guztiak, eta haien guraso nahiz aiton-amonak gonbidatu dituzte. Hala ere, ekitaldia publikoa izango dela jakinarazi du udalak, herritarrentzat oro har, edo ohitura ezagutu nahi dutenentzat. Aurretik, hitzaldia Atsolorraren ohitura zer den azaltzeko beharra azaldu dute ekitaldiaren antolatzaileek. Horregatik, hitzaldia antolatu dute hilaren 14rako (larunbata), 10:30ean hasita udaletxeko areto nagusian, Azmarrinekin elkarlanean. Mari Karmen Basterretxea antropologoak emango ditu errituaren gaineko xehetasunak.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.