Badia Eskola eta udal liburutegien ekimenez, antzerki ikasleek haurrei ipuinak kontatzeko egitasmoa abiatu dute. Kontakatilluketan epe luzerako asmoa izatea nahi dute, eta formazioari garrantzia berezia eman diote.
Gaur dute lehen saioa, Trintxerpen, Badiako ikasleek
Antzerki ikasleak ipuinak kontatzen. Kontakatilluketan proiektua da hori. Haurrak, haurrei ipuinak kontatzen, haurrek beste haur helduago batzuengandik literaturan eta ipuin kontaketan murgiltzeko gonbidapena jasotzen. Hori egin dute Pasaiako Badia Eskolako kideek eta Pasaiako liburutegiek elkarlanean. Kontakatilluketan da emaitza. Gaur egingo dute (18:00) Badia Eskolako lau ikaslek lehen kontaketa Trintxerpeko liburutegian. Ondoren, 24an Antxon izango dira, apirilaren 14an San Pedron, eta 21ean Antxon. Olatz Cortes, Maddi Vicente, Maria Avila eta Leire Muñoz izango dira kontalariak.
Antxoko Kultur Etxea izan zen egitasmoaren epizentroa, espazio berdin batean liburuak, literatura, antzerkia —bertan egiten dituzte entseguak Badia Eskolakoek—, ipuin kontaketak, haurrak eta gogoa, gogo asko batu zirelako. Antxoko liburutegiko liburuzainak piztu zuen garra, Badiakoei ideia luzatu, eta lanean jarri ziren. «Gauza polita da espazio berberean lanean ari den jendea ados jartzea. Guk ikasle pila ditugu, eta handienek arte eszenikoetan oinarria dute. Zergatik ez eraman horiek txikiagoei ipuinak kontatzera?»; egitasmoaren hasiera horrela laburbildu du Iker Fernandez Badia Eskolako irakasleak. Konexio asko izan ziren haurrak irakurketara konektatzeko euskarria sortzeko.
Ideia izanda, kontalariak behar. Arazorik ez. Ikasleek gogoz hartu zuten arte eszenikoetara beste era batera hurbiltzeko aukera, «gaitasun berriak topatzeko baliabide izan da haientzat. Entseguetan nabarmena da hori, eta gainera, herriari eta haurrei ekarpena egiten diete», azaldu du Fernandezek: «Hasieratik garbi genuen ondo egin nahi genuela egitasmoa. Formazioa oinarrizkotzat jo genuen, eta egitasmoan parte hartzeko prest zeuden ikasleak formatzeari ekin genion, hainbat baliabide eta euskarrirekin. Ez genuen zerbait puntuala egin nahi, luzerakoa baizik».
Hamar ikasle
Hamar ikaslek jaso dute formazio orokor hori. Maider Galarzak izan du pisu handiena horretan, hura ere ipuin kontalaria baita.
Ipuin idatzitik, ahozkotasunera pasatzea funtsezkoa izan da Galarzaren ustez: «Horretarako objektuak, musika eta gorputza erabili dituzte ikasleek, ipuinaren mamiaz jabetzeaz gain».
Lehen kontaketak lauko talde batek egingo ditu, eta uda ondoren beste talde bat arduratuko da kontaketetaz.
Irakasleek nabarmendu dute ikasleen artean sortu den giroa, nahiz eta ikastetxe edo ingurune ezberdinetakoak izan, «eta euskarazko harremana izan dute. Euskaraz ikasi dute, sozializatu dira. Ederra izan da prozesu osoa».
uetxebeste@hitza.eus
