Etxegabetze bat gelditzeko elkarretaratzea egin dute gaur goizean Trintxerpen

Miren Peñaren heriotza salatu dute Santander banketxearen atarian bildutakoek; Laboral Kutxara ere joan dira protestan.

olatz mitxelena

2015/03/23

Miren Peñaren heriotza salatu dute elkarretaratzean

Miren Peñaren heriotzak erabat baldintzatu du Kaleratzeak Stop Plataformak deituta gaur goizean Trintxerpen egin den elkarretaratzea. “Hilketatzat” jo dute han bildutakoek Antsoainen gertatutakoa, eta “banketxeak” eta “gobernu konplizeak” jo dituzte “heriotzaren arduradun”. Laboral Kutxaraino protesta eraman eta deialdia luzatu dute biharko, 19:00etarako, Donostiako Bulebarrean egingo den manifestaziora joateko. Gaurko elkarretaratzeak, ordea, Maria Luisa Suarez eta Cristina Baez ama-alaben kasua salatzeko helburuz deitu dute. Hiru urte darama familiak Santander banketxearekin mailegua berriro negoziatzeko saiakeran, baina, orain arteko ahalegin guztiak alferrikakoak izan direla adierazi du Cristina Baezek. Are gehiago, berme-emaileen kontrako demanda batekin erantzun die banketxeak beren eskakizunei, eta orain Cristina Baezen gurasoek berme gisa jarritako etxea gal dezakete. Demanda hori bertan behera gera dadin, eskaera egin diote gaur goizean Santander banketxeari, eta hiru urteko karentzia eskatu diote. Kaltetuekin batera Amaia Agirregabiria alkatea izan da banketxean, eta baita Ezker Anitzako zinegotzi Xabier Pombo ere. Udala kaltetuek banketxearekin lortu nahi duten negoziazioan bitartekari lanak egiteko prest azaldu da. Herritar asko izan dira elkarretaratzean, Maria Luisa Suarez eta haren senar Bienvenidori elkartasuna adierazteko. EH Bildu eta Ezker Anitzako ordezkariek ere babestu dute elkarretaratzea.

Udala bitartekari lanak egiteko prest agertu da

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.