Gaskon eta Errazkinek Antxoko pilotaleku berria bisitatu dute
Udaleko ordezkariekin batera egin dute bisita eta obrako arkitektoen azalpenak entzuteko aukera izan dute
Ingurumen diputatu Iñaki Errazkin eta Lurralde Antolaketako Zuzendari Nagusi Peio Gascon Pasai Antxon izan dira gaur eguerdian, Molinao itsasadarra urbanizatzeko egiten ari diren lanak bertatik bertara ikusten. Amaia Agirregabiria alkateak egin die harrera, eta baita barrutiko alkateorde eta zerbitzuetako buru Izaskun Biurrunek eta kiroletako zinegotzi Miguel Mari Torreak ere.
Laster bukatuko dituzte lanak Molinao itsasadarrean. Pilotalekua margotzen ari dira jada, eta inguruko urbanizazioa ere, nahiko aurreratua dute. Dena ongi bidean frontoia eta inguruko azpiegitura guztia apirilaren bukaera alderako erabilgarri egongo dela iragarri dute obrako arduradunek.
Aldundiarekin hitzartuta
Molinaoko itsasadarra urbanizatzeko lanak udalak eta aldundiak biziberritzerako sinatutako azken hitzarmenari esker finantzatu dira. Garai bateko industriaguneko lurren deskontaminazio lanetan 300.000 euro inbertitu dituzte, eta proiektua idazten eta obra zuzentzen, 120.0000 euro. Obrak, guztira, 1.367.849 euroko aurrekontua izan du, eta aldundiak %85 hartu du beregain.
