Udal Gobernu Taldearen arabera Antxon trafikoa asko murriztu da
Bertakoentzako aparkalekua bermatuta dagoela ikusita, bisitariek Luzuriaga osoan aparkatzea izango dute, goizez eta arratsaldez
Astebete da Antxon aparkatzeko sistema berria indarrean dagoela, eta gobernu taldearen arabera, balorazioa “positiboa” da. Esan dutenez, “nabaria da auto gutxiago ibili dela barrutian”, besteak beste, aparkatzeko Gelasio Aranburutik Luzurigara zuzenean joatea ahalbidetu dutelako.
Bestalde, bertakoentzako aparkatzea “errazagoa eta azkarragoa” izan dela nabarmendu dute eta Antxok beste herrietara iristeko disuasio-parkinga izateari utzi diola.
Halaber, antxotarrei eskerrak eman diete “aldaketaren aurrean erakutsi duten jarrera onagatik”. Bertakoen txartelen eskaera eta banaketa prozesua ordenatuta izan dela eta sistema berriaren ezarpenean ere ez dela nabarmentzeko moduko arazorik suertatu esan dute.
Bisitarientzako toki gehiago
Luzuriagan bertakoentzako lekua bermatuta dagoela ikusirik bisitarientzako baldintzak hobetzea erabaki dutela jakinarazi dute baita ere. Hala, 06:00etatik 13:00tara eta 16:00etatik 19:00etara bertakoak ez direnek ere aparkatu ahalko dute Luzuriagan.
Azkenik, Gelasio Aranburu kalean, zenbait aparkaleku kendu dituztela ohartarazi dute, Nafarroa Hiribidetik gertuen dagoen zatian, oinezkoentzako espaloia zabaldu nahi dutelako zati horretan. 
