EAJk ekarpenak biltzen jarraitu nahi du
Nahikari Oterminek "modu baikorrean" baloratu ditu Pasaiako eragileekin egindako bilerak
Jeltzaleek adierazi dutenez, “herritarrekin batera egiten ari diren diagnostikoaz baliatuko dira pasaitarren ilusioa piztuko duen proiektu sendoa aurkezteko, herritarrak kontutan izango dituena eta beraien beharrei erantzungo diena”.
EAJren alkategai Nahikari Oterminek adierazi duenez, pasaitarren banakako ekarpen ugari jaso dituzte dagoeneko, herritarren iritzi, ardura eta proposamenak jasotzeko orain dela aste batzuk antolatu zituzten parte hartze bide ezberdinak erabiliz.
Jeltzaleak nabarmendu duenez “herritar asko izan dira zaborrak biltzeko Bilduren udal gobernuak inposaturiko sistemarekin beraien desadostasuna erakutsi dutenak”, eta beste askok “kale garbiketa hobetzeko” eskatu dutela nabarmendu du. Oterminek zehaztu duenez, “haur parkeen egoera hobetzea eta hauek estaltzea, herriko komertzio txikia babestea, ekintzaileen lana bultzatzea edota gazteentzako aisialdirako eskaintza berriak sortzea” daude jaso dituzten eskarien artean.
Oterminek “jasotako ideia, proposamen eta iradokizun bakoitza eskertu” du. “Agerikoa da Pasaiako kultur, kirol, ekonomia edota gizarte eragileek asko dutela esateko” nabarmendu du. Jeltzaleen ustez, Pasaiak “guztien alde lan egingo duen udal gobernu eraginkorra” behar du.
EAJk pasaitarrak animatu nahi izan ditu parte hartzera eta beraien ekarpenak egiten jarraitzera, horretarako web orria erabiliz edota Facebook , twitter edo helbide elektronikoa erabiliz. 
