842 alegazio AHTren kontra

Astigarraga, Oiartzun eta Lezo arteko trenaren proiektua bertan behera uzteko eskatu dute Donostiako eta Oarsoaldeako AHTren aurkako taldeek

olatz mitxelena

Errenteria-Orereta,Lezo,Oiartzun,Pasaia

2015/04/13

AHTren kontrako elkarretaratzea, alegazioak aurkeztu bitartean

Gaur aurkeztu dituzte alegazioak, Espainiako Gobernu-Ordezkaritzak Donostian duen egoitzan. Azken egunotan Martutenen, Donostian, Errenteria-Oreretan, Oiartzunen eta Lezon bildutako alegazioak dira guztiak, eta AHTren aurkako taldeetan bildutakoek esan dutenez, LAB sindikatuak, Eguzki talde ekologistak, Martuteneko Auzo elkarteak, Uliako auzo elkarteak, AHT Gelditu! Elkarlanak, 2016desokupatu ekimenak eta Alternatiba Eraikitzen taldeak izenpeturikoak daude aurkeztu dituzten alegazioen artean. Alegazioak aurkeztu bitartean, hogei lagun inguru elkarretaratu dira gobernu ordezkaritzaren aurrean, AHTren erokeria gelditu lemapean. AHTren egitasmoak “lurraldeari eraso egiten diola” salatu dute kontrako alegazioak aurkeztu dituztenek, eta besteak beste, “egitasmo honi loturiko beste azpiegiturek ere desadostasun sozial eta instituzional garrantzitsua eragiten dutela” argudiatu dute, Lezo-Gaintxurizketan ezarri nahi den merkantzien garraiorako plataforma logistikoa eta Jaizkibelgo kanpo kaia kasu. Beharrik ez AHTren kontrakoen ustez “egungo trenbide sareak trafiko guztiak bideratzeko gaitasuna izango du, hirugarren errailarekin trenbide zabalera europarrera egokitzen denean”. Horregatik defendatzen dute azpiegitura berri bat ez dela beharrezkoa “are gehiago, gobernu frantziarrak Bordeletik hegoaldera Abiadura Handiko Trenbide berri bat eraikitzeko asmoa baztertu duenean”. Horrez gain,” Astigarraga-Oiartzun-Lezo tarteko eraikuntza lanen kostu ekonomiko itzela” salatu dute – 440 milioi euro– eta “bestelako premia sozialei lehentasuna ematea” aldarrikatu dute. Honenbestez, AHTren Astigarraga-Oiartzun-Lezo zatiaren tramitazioa bertan behera uzteko eta Euskal Y-aren eraikuntza lanak geldiarazteko eskatu dute eta “herritarren artean eztabaida eta erabaki prozesu parte-hartzaile bat abian jar dadin” eskatu dute.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.