Pasaiako Udalak errepublika garaiko maistrei aitortza egingo die

'Las maestras de la republica' dokumentalaren proiekzioa antolatu dute datorren astelehenerako

olatz mitxelena

2015/04/14

Ikurrina eta Errepublikako bandera, Antxoko azokan, gaur

Pasaiako Udalak Errepublikaren Egunarekin bat egin du bigarren urtez, eta horren harira, Las Maestras de la República izeneko dokumentalaren proiekzioa antolatu du. Astelehenean proiektatuko dute, San Pedroko udal liburutegian, 18:30ean. Proiekzioaren ondoren, dokumentalaren zuzendari Luz Martínez Ten madrildarrak hartuko du hitza, proiektuen nondik norakoen berri emateko. Las Maestras de la Republica lanak dokumental onenaren Goya saria eskuratu zuen iaz. Hezkuntza sistema modernizatu nahi zuten emakume ausart eta konprometituen istorioa kontatzen du, orain arte publikatu gabeko irudi eta testigantzen bidez. Udalak aurreratu duenez “proiekzioaren ondoren izango den solasaldian garai haien gaineko gogoeta egitea da asmoa, irakasle errepresaliatuak omenduz, mugimendu feministaren ikuspuntutik betiere”. Errepublika garaian euskararen egoera zein zen aztertuko dute baita ere. Ekitaldia irekia izango da eta udalak San Pedroko liburutegira gerturatzeko gonbidapena zabaldu die “pasaitarrei zein garai latz haiek bizi izan zuten herritar eta senide guztiei”. Iaz, omenaldia Iaz ere bat egin zuen Pasaiako Udalak II. Errepublikaren aldeko ospakizunekin. 36ko gerran errepresaliatutako Udalbatza demokratikoari, eta baita garaiko udal langileei eta errepresioa jasan zuten herritarrei omenaldia egin zien eta Arizabalo Jauregiko Areto Nagusian Koldo Izagirreren hitzak jasotzen dituen plaka bat jarri zuen.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.