PPren alkategaiarentzako, helbururik garrantzitsuenak "Pasaia eraldatzea eta aktibitate ekonomikoa eta enplegua sortzea" dira.
Gaur eguerdian aurkeztu du PPko alkategai Maria Garrapizek bere hautagaitza, San Pedroko Torrean. Alkategaia laguntzen ahaldun nagusirako hautagai Juan Carlos Cano izan da, baita PPko oraingo Pasaiako zinegotzi David Hernandez ere, besteak beste.
Ayudas más justas plataformako Gipuzkoako burua da Maria Garrapiz, eta eguerdian azaldu duenez, “iruzurraz nazkatuta” zegoelako hartu zuen plataformako gidaritza, “gizarte bidezkoago baten alde” egiteko. Izan ere, Garrapizentzat “gizarte laguntzak benetan behar dituzten pertsonentzat izan behar dute”. Pasaiarako bere hautagaitza, “kezka berberak bultzatuta” aurkeztu duela adierazi du alkategai gazteak. 24 urte ditu Garrapizek. Nuevas Generaciones erakundeko kidea da eta zuzenbide ikasketak egin ditu.
Garrapizen aburuz, “Gipuzkoak zorra historikoa du Pasaiarekin”. Portua, “aberastasuna sortzen duen azpiegitura izanik, gipuzkoar ekonomiarentzat zein gipuzkoarren ongizatearentzat funtsezkoa” dela iritzi dio, baina “bere kokapenak udalerriaren modernizaziorako oztopoa” dela uste du. Zentzu horretan, aldundiak badiaren leheneratzean inplikatu behar duela defendatu du.
Pasaiarentzat “konfrontazioaren kultura ez dela balekoa” esan du Garrapizek, eta “PPren ideiak Pasaiarako ez dutela balio diotenek porrot egin dutela” defendatu du. Horregatik, “aukera bat” eskatu du, “Pasaiaren eraldaketa” lortu, “udalerria erakargarria” egin, eta “aktibitate ekonomikoa eta enplegua” sortzeko. PPrentzat Pasaian helburu garrantzitsuenak horiexek direla nabarmenduz bukatu du aurkezpena Garrapizek.