Maiatzaren 13ra bitartean entregatu daitezke lanak; aurten, lehendabizikoz, aldizkaria postontzi guztietara banatuko dute, doan.
Uztailaren 3tik 8ra ospatuko dira aurten Antxoko sanferminak, eta jai batzordea festetara begira ari da jada. Iragarri berri dutenez, aurten lehendabizikoz doan banatuko da jaien atarian kaleratu ohi den aldizkaria. Zehaztu dutenez, gainera, barrutiko postontzi guztietara banatuko dute.
Aipatu aldizkarian, jaien egitaraua ez ezik, herriko elkarte eta eragileen idazlanak bildu ohi dira. Jai batzordeak iragarri duenez, horiek biltzen hasiak dira jada, eta deialdia zabaldu dute, lanak jasotzeko epea maiatzaren 14ra bitartean izango baita zabalik. Ohi baino lehenago itxiko dute epea, tirada handituko denez, aldizkaria lehenago bidali behar dutelako inprentara. Testuak
posta elektroniko bidez helarazi daitezke, edota nahi izanez gero, jai batzordeko kideei zuzenean entregatuta.
Antxoberfest eta kartela
Horrez gain,
jaietarako kartel lehiaketara lanak entregatzeko epea zabalik dela gogorarazi du jai batzordeak. Maiatzaren 20ra arteko epea dago proposamenak helarazteko. Lan irabazlea, jaietako karteletako irudia ez ezik, aldizkarirako azala ere izango da.
Azkenik, gogoratu, urtero sanferminetarako dirua bildu asmoz jai batzordeak antolatzen duen garagardo azoka maiatzean izango dela.
IV. Antxoberfest maiatzaren 14ean, 15ean eta 16an izango da, eta urtero legez, ohiko jaki eta askotariko garagardoak ez ezik, herriko kultur eragileen partaidetzaz, festa giroa nagusituko da barrutian.