Meatze erromatar bat ireki dute Arditurrin
Santa Barbara meatzea erromatarrek utzi zutenetik bere horretan mantendu da.
Arditurriko meategiak hobeto ezagutzeko beste meatze bat ireki dute, Santa Barbara meatzea. Gaur goizean aurkeztu diote komunikabideei zer nolako lana egin den publikoari ireki ahal izateko; bertan izan dira Aiora Perez de San Roman Oiartzungo alkatea, Luis Mari Zaldua Parketxe Sareko zuzendaria, Imanol Agote Eusko Jaurlaritzako Kultura Ondare zuzendaria eta Mertxe Urteaga Arkeolaneko zuzendaria.
Santa Barbara meatzea erromatarrek utzi zutenetik bere horretan mantendu da eta azaldu dutenez erromatarren meatze ingeniaritzaren erakusle bikaina eskaintzen du. Mearen dekantaziorako baltsa ere ezagutu daiteke eta Erdi Arako burdinola hidraulikoaren aztarnak aurkitu dira.
[nggallery id=36]
Jendea sartzeko moldatu egin dute guztia, sendotze lanak egin dira eta babes neurriak hartu dira. Bisita gidatuak eskainiko dituzte, bisita bakoitzean bost lagun inguru sartu ahal izango dira eta horretarako aldez aurretik eskatu behar da lekua.
