Euskararen erabilera ile-apaindegietan sustatuko du Oarsoaldeko Euskara Batzordeak
Orain dela bost urtetik, euskararen erabilera gremio batean sustatzen du Oarsoaldeko Euskara Batzordeak. Okindegi, harategi, arrandegi eta barazki zein fruta dendetan ahalegina egin ondoren, ile-apaindegien sektorearen txanda izango da aurten.
Gaur goizean egin dute kanpainaren aurkezpena, Errenteria-Oreretako Itziar Alvarez ile-apaindegian. Bertan izan dira eskualdeko euskara zinegotziak zein merkatari elkarteen ordezkariak. Errenteriako Euskara zinegotzi Irune Balentziagak azaldu duenez, urtero hainbat komunikazio ekintza egiten dituzte euskara sustatzeko, hala nola, esku-orrien, katalogoen edo gutunen banaketa. Gainera, euskara teknikariek ere laguntzen diete merkatari zein ostalariei.
Pasaiako zinegotzi Migel Mari Torreak aurtengo ekintzak zerrendatu ditu. Horrela, euskarazko zerbitzuaren berri emateko marko bat banatuko dute ile-apaindegietan. Gainera, irratietan kuñak sartuko dituzte, Kimetz ile-apaindegiko Jabier Jauregiren ahotsarekin. Gainera, udazkenean zozketa bat egin dutela iragarri du, ilea apaintzeko produktuen euskarazko izena papertxo batean jarriz. Irabazleak ehun euroko bonoa izango du orrazkera berria egiteko. Oraingoz, Pasaian hemeretzi establezimendu batu dira, Oiartzunen hamalau, Lezon zortzi eta Errenteria-Oreretan hemeretzi (62ren erantzuna jaso behar dute).
![Ile-apaindegietan euskara sustatuko dute](http://oarsoaldea.hitza.eus/site/files/2015/05/IMG_6867-300x187.jpg)
Ile-apaindegietan euskara sustatuko dute
Ile-apaindegietan euskara sustatzeaz gain, udalerrietako eremu konkretuetan lanketa abiaraziko dute Irati Etxebeste Oiartzungo zinegotziak adierazi duenez, Errenteria-Oreretan Biteri kalean eta Beraun auzoan, Lezoko Zubitxo kalean eta Oiartzungo Mamut merkataritza zentroan egingo dute lan espezifikoa. Etxebestek azaldu duenez, hiru fasetan jorratuko dute gaia. Lehenik eta behin, diagnosia egingo dute, eta kanpoaldeko errotulazioa zein kalera begirako oharrak euskaratzeko ahalegina egingo dute. Bigarrenik, establezimendu barruan bezeroei begirako idatzi, ohar eta beste elementuak euskaratzea. Azkenik, langileentzako dituzten idatzi eta elementuak euskarara pasatzea ahalbidetuko dute.
Mikel Arruti Lezoko zinegotziaren arabera, kanpaina “hizkuntza paisaia euskaratzeko” abiaraziko dute. “Euskararekiko begirunez egiten dugu, eta lehen hitza euskaraz izatearen garrantzia nabarmendu nahi dugu”, gaineratu du. Azkenik, Oskar Zapirain Oiartzungo Iturri merkatari elkarteko kideak adierazi du euskarak “kalitate handiagoa” ematen diola zerbitzuari, eta merkatariak animatu ditu kanpainan parte hartzera.