Berez azken saioa beharko luke, baina parte-hartzaileek hala adostekotan udalak ez du baztertzen prozesua luzatzea
![Antxo Eraikiz erakusketa, azokan](http://oarsoaldea.hitza.eus/site/files/2015/03/erakusketa-300x188.jpg)
Antxo Eraikiz erakusketa, azokan
Asteazkenean, 19:00etatik aurrera, Antxoko ikastolan. Hantxe bilduko dira
Antxo Eraikiz prozesuan bildu diren antxotarrak, barrutiko etorkizunaz eztabaidatzera.
Udalaren hasierako plangintzaren arabera, etziko saioa azkena beharko luke, baina herritarrek beharra ikusiz gero saio gehiago antolatuko dituztela jakinarazi du udalak, “prozesuaren ondorioek berebiziko garrantzia izango dutelako barrutiaren etorkizunean” eta “erabakiak patxadaz hartzea garrantzitsua” dela iritzi diotelako.
Bileraren helburua proposamen zehatzak lantzea izango dela zehaztu dute, eta horrez gain, bileraren bigarren zatian proposamenak parte-hartzaile guztien artean adosten saiatuko direla aurreratu dute.
Udalak parte hartzeko deia egin die herritarrei, “etorkizuneko Antxoren inguruan erabakiak hartzea” denon ardura dela defendatuz.
Internetez parte hartzeko aukera
Horrez gain, bigarren bilerako akta
udalaren webgunean laster egongo dela ikusgai aurreratu dute. Azokan jarrita dagoen erakusketako irudiak eta lehenengo bileraren akta ere esteka berberean ikus daitezke. Azkenik, bileretara joan ezin dutenentzako ekarpenak egiteko formulario bat ere deskargatzeko aukera dagoela gogorarazi dute. Formulario hori bera Azokan ere eskura daiteke.