Oiartzungo EH Bildu-k hauteskunde kanpaina barruko ekitaldia egin du goizean.
EH Bilduren kanpaina barruko ekitaldia
Oiartzungo EH Bilduk hauteskunde kanpainako ekitaldi politikoa egin du gaur goizean. Ohiko mitinen aurretik, bertara hurbildu diren herritarrek eta zerrendakideek ideiak elkarbanatzeko aukera izan dute mokadutxo bat jaten zuten bitartean.
Bi adarren doinuarekin bertaratutakoak bildu eta Joxean Agirre EH Bilduko kideak hartu du lehenik hitza. Orain lau urte atzera begira jarri da eta orduko egoera gogoratu du, legez kanpo egotearen arriskuan zeudela. “Oraingo panorama bestelakoa da, aldaketa haizeak jo dio Euskal Herriari eta asko guk eragina izan da. Kateak hausteko garaia da eta herritarrekin batera euskal bidea jorratu behar dugu”, adierazi du.
Espainiak jarritako oztopoei EH Bilduk alternatibak proposatu dituela nabarmendu du; hala nola, lau alorretan egin ditu proposamenak: biktimak eta memoria alorrean, presoen alorrean, armagabetzean eta desmilitarizazioan.
Era berean, EH Bilduk hainbat konpromiso hartu dituela esan du: “Gure esku dagoena jarriko dugu gatazkaren ondorioak eta arrazoiak aztertzeko eta ez ditugu besoak jaitsiko presoak etxera ekarri arte”. Bide horretatik, Oiartzungo preso Josune Balda eta Joxean Etxeberria izan ditu gogoan jendearen txalo artean.
“Denak balio die aginte makila berreskuratzeko”
EAJ ere izan du hizpide Agirrek: “Denak balio die aginte makila berreskuratzeko. EH Bildu instituzioetatik kanpo nahi dute eta horretan dabiltza Olano, Cano… Atzean indarra dute, hor dituzte Adegi eta
El Diario Vasco, esaterako”. Andoni Ortuzarren hitzak ere gogora ekarri ditu: “PNVkoak errebeldeak zirela esan zuen Ortuzarrek; bai egia da, enkausatuta daude, hemen ongi ezagutzen duzuen Beramendiren antzera”.
“Ez erlaxatu mesedez, herriz herri egin behar dugu ahalegina. Gipuzkoan
goleada sartu behar dugu, herritarrak ahaldunduz egingo dugu Gipuzkoa”, adierazpenekin zuzendu da herritarrengana.
“Gardentasuna” oinarri
Dantzarien emanaldiaren ondoren, oraingo gobernu taldea eta hauteskundeetara aurkeztu den lantaldea aurreratu da. Jexux Leonet alkategaiak hartu du hitza. Orain arte egon den taldeari eskerrak eman dizkie “azaldu duten konpromisoagatik”; denen izenak jendearen txalo artean esan ditu.
Krisi ekonomiko “larriak” proiektuak baldintzatzen baditu ere, gizarte politikak murrizketarik jasan ez dituela adierazi du, Oiartzunen zein Gipuzkoan.
Parte hartze prozesuei ere garrantzia berezia aitortu die eta horren adibide gisa aurrekontuak dinamika horren bidez eztabaidatu direla jarri du. “Gardentasuna, hori da gure oinarria”, nabarmendu du. Herri programa ere herritarren parte hartzearekin osatu dela esan du, “500 ekarpen baino gehiago jaso ditugu”.
Talde berria “ilusioarekin” datorrela azaldu du eta euren lehentasunak besteak beste enplegua eta etxebizitza izango direla, gizarte politika indartzen jarraitzearekin batera. “Kontsumo eredu berriak ere behar ditugu, nekazariei lagundu behar diegu, kontsumo taldeak sortu behar dira”.
Eragile guztiekin lana, euskara, gardentasuna eta berdintasuna, horiek izango dira EH Bilduren alkategaiaren esanetan legegintzaldi berriko proiektuak.
“Gatazkaren konponbideak salatzen jarraituko dugu. Oiartzun justu eta orekatua izango da oinarri, bidea elkarrekin egingo dugu”, hitzekin bukatu du mintzaldia.
[nggallery id=45]
