Plenoak bere egin ditu Proisaren eta Antxo Eraikizen eskaerak

Adostasuna ia erabatekoa izan da legegintzaldiko azken plenoan

olatz mitxelena

2015/05/12

Hautetsi guztiak batera, legegintzaldiko azken plenoan

Aktak berresteko plenoa egiteke, legegintzaldiko azken plenoa egin dute gaur goizean Pasaian, zinegotzi guztiak bertan zirela, eta Ogasuna ataleko gaietan izan ezik, adostasuna ia erabatekoa izan da. Denak ados agertu dira, esaterako, Proisaren eskaera bere egitean. Proisako Igor Carballok hartu du hitza eta egungo udalbatzarrari, zein hauteskundeen ondoren etorriko denari, Proisaren gaiari lehentasunez heltzeko eskatu die, aldundiarekin gaur gaurkoz hitzartuta duten diru partida gal ez dadin. Aho batez onartu dute eskaera. Ildo beretik joan da antxotarren eskaera. Iñaki Ruizek hitz egin du Antxo Eraikiz parte hartze prozesuan parte hartu dutenen izenean, egungo udalbatzarrari, hauteskundeen ondoren eratuko denari gaiaren berri eman diezaion eskatzeko. PPko zinegotziak izan ezik (abstenitu egin dira), guztiek ontzat eman dute eskaera. Karmengo Ama ikastetxera bisita Karmengo Ama ikastetxearentzat, haur eskolarako instalazioen lagapenaren luzapena adostu dute ere gaurkoan, eta aho batez adostu, kontratua bost urtera arte luzatu ahal izatea. Esan, baita ere, bihar jaurlaritzako hezkuntza departamentuko ordezkari bat Karmengo Ama ikastetxea bisitatuko duela, eraikina ezagutu eta bertan DBH ezartzeko izan daitezkeen aukerak gertutik ezagutzeko. Hirigintza atalean, bestalde, biziberritze jardun batzuk bukatu ahal izateko udalak eta aldundiak sinatutako hitzarmenaren hirugarren eranskinari argi berdea eman diote gaur. Hitzarmen horretan jasotzen dira, besteak beste, lonjako lanak bukatzeko partidak, Donibaneko lur-jauziak konpontzeko dirua, edota erabilera anitzeko Donibaneko eraikinaren kultur ekipamenduak hornitzeko beharko direnak.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.