EH Bilduren alkategai Jexux Leoneten hitzetan oiartzuarrek merezi duten kudeaketa egingo dute .EAJk gora egin arren, emaitzak "eskasak" direla nabarmendu du Garinek
EH Bilduk antolatuta, Kontzejupean elkartu ziren herritarrak emaitzak jarraitzeko
EAJren igoera nabarmena izan da Oiartzunen hauteskunde hauetan: 691 bozkatik 1.358 bozka lortzera iritsi da. Hala, lau zinegotzi izango ditu Eusko Alderdi Jeltzaleak legegintzaldi berrian, bi gehiago. Hala eta guztiz ere, Segundo Garin EAJko alkategaia ez dago batere kontentu: “Eskasa da nire balorazioa, askoz gehiago lortzea espero nuen, udaletxea orekatu ahal izateko. Harrigarria da. Atera diren emaitzek ez dute herriaren errealitatea islatzen, baina herriak erabaki du eta errespetatu egin behar dugu”.
EH Bilduk boto gehien jaso ditu (3.169), baina bozka gutxiago izan ditu orain lau urte baino eta horrek zinegotzi bat gutxiago izatea eragin dio. Beste bat lortzeko 226 bozka behar zituen. Horren aurrean, baina, Jexux Leonet EH Bilduko alkategaia baikor azaldu da, balorazio “oso positiboa” egin du: “Babes zabala jaso dugu, gure proiektua babes zabala jaso du eta hori herritarrekin egin dugu”.
Aurrera begira jarrita dago alkate izango dena: “Lana dugu helburu eta horri ekin behar diogu. Oiartzuarrek merezi duten kudeaketa egin behar dugu”.
7.993 oiartzuar zeuden deituak bozkatzera eta horietatik 2.885 ez dira hauteslekuetara joan. Horren aurrean haserre agertu da Garin: “Abstentzioa gehiegizkoa izan da, ez dakit zergatik izango den. Alderdi baten edo bestearen alde ez dago edo ez dakit… herri honetan esango nuke pasota gehiegi ditugula”.
Parte hartzea behera
Orain lau urteko udal hauteskundeekin alderatuta, parte hartzeak behera egin du. Eguerdian emandako datuetan eta arratsaldeko datuetan ikusi da hori. Eguerdian, %36,67ak emana zuen botoa, 2011n baino hiru puntu gutxiago; eta arratsaldean, %49,36ak, 2011n, aldiz, %53,77k.
Lau zerrenda zeuden aurkeztuta, PP eta PSE-EEk ez dituzte zinegotzirik lortu.
Oiartzuarrei eskerrak
Jexux Leonetek esker hitzak izan ditu oiartzuarrentzat: “Eskerrak eman dizkiet emandako babesagatik eta esker bikoiztuak proiektuan parte hartu dutenei. Herritarrekin kontatu ahal izan dugu eta hori benetan eskertzekoa da”.
Ekainaren 13an hartuko dituzte alkate eta zinegotzi karguak hautatuek. “Data horri begira prestatzen joango gara eta elkarlana bultzatuko dugu legegintzaldi honetan”.
