Aldaketa erabatekoa izan da; Pasaiak Ahal Du-k hiru zinegotzi lortu ditu eta PPk eta Irabazi Pasaiak ez dute lortu ordezkaritzarik; Parte hartzea ia hamar puntu igo da
Karmengo Aman, hautetsontziak
Atez atekoaren gaineko kontsulta atzorako deitua zuen Pasaiako PSE-EEk eta apustua ondo irten zaiola argi da. 2.146 botoekin, lehen indarra da Pasaian.
Orain arte lehen indarra izan denak, berriz, zaplazteko dezentekoa jaso du. Hirugarren postuan da EH Bildu, eta zortzi zinegotzi izatetik 4 izatera pasatu da, ordezkaritzaren erdia galduta. Txanponaren beste aldea.
EAJk, aldiz, badu zer ospatu Pasaian ere. Gorakada nabarmena izan du. Hirugarren indarra izatetik bigarren izatera igaro dira jeltzaleak, bi zinegotzi irabazita. Bost dituzte, PSE-EE bezala.
Indar berria
PPk zituen bi ordezkariak galdu ditu eta Irabazi Pasaia hautagaitzak, ezkerreko indarrak batu arren, ez du lortu Pasaiako Ezkerrak orain arte zuen ordezkari bakarrari eusterik.
Esan daiteke hauen botoak Pasaiak Ahal Du bereganatu dituela. Indartsu sartu da talde berria udaletxean, hiru zinegotziekin, eta 1.113 boto gehituta.
Baina nabarmentzeko moduko beste daturik bada, horixe parte hartzearena izan da. Ohi baino askoz jende gehiago joan zen atzo bozkatzera Pasaian. 2011ko hauteskundeekin alderatuta ia hamar puntu igo da parte hartzea. %63,40koa izan da aurten, eta 54,03koa izan zen orain dela lau urte.
Pasaiako PSE-EE, oso pozik
Emaitzak oraindik asimilatzeke eman du PSE-EEko Izaskun Gomezek balorazioa, «erabat positiboa». Gomezen arabera, Pasaiako PSE-EEren emaitzak «ez dira kanpainaren ondorio izan, legegintzaldi osoan egindako lanaren emaitza baizik; inposizioen kontra eta bizilagunen ondoan egotearen ondorio».
Politika eraldatzen ari dela uste du Gomezek, «herritarrek parte hartu nahi dutela eta beren ahotsa entzun dadila eskatzen ari direla». Horregatik, «nahi horri bizkar ematen gobernatzen duen edonork zigorra jasoko» duela ziur da antxotarra. «Ikasgaia nire egiten dut», esan du Gomezek. «Politika bulegoetatik egiteko garaia pasatu egin da».
Emaitzak:
PSE-EE 2.146 boto 5 zinegotzi
EAJ 2.001 boto 5 zinegotzi
EH Bildu 1.834 boto 4 zinegotzi
Pasaiak Ahal Du 1.113 boto 3 zinegotzi
PP 327 boto zinegotzirik ez
Irabazi Pasaia 244 boto zinegotzirik ez
