Ekainaren 21ean egingo den danborrada erraldoian parte hartuko du Antxok, eta entseguak antolatu dituzte
Antxoko Gure Esku Dago
12:00etan hasiko da larunbatean Antxoko
Gure Esku Dago-k antolatutako Joste Eguna. Antolatzaileek zehaztu dutenez, orain arte saldutako oihal guztiak josiko dituzte Gure Zumardian. Era berean, oraindik saretu ez direnek, beren atxikimendua adierazi eta oihal zatia erosteko aukera izango dutela iragarri dute.
Oihala aurrez hartu dutenei, berriz, larunbatean zumardira eramateko eskatu diete. Izan ere, batzuk joste lanetan ariko diren bitartean, besteek beren oihalak pertsonalizatzeko aukera izango dute, guztia, danbor hotsek girotuta.
Azkenik, ekainaren 21ean Donostian izango den ekitaldi nagusiaren gaineko xehetasunak azalduko dituztela iragarri dute.
Danborrak astinduz
Ekainaren 21ean, igandea, Anoetako estadioa bete eta hautetsontzi erraldoia irudikatuko da erabakitzeko eskubidea aldarrikatzeko. Gauza berea egingo dute egun eta ordu berean, Euskal Herriko gainontzeko hiriburuetan. Hautetsontzi erraldoiak irudikatzeko, berriz, azken hilabeteotan herriz herri norbanakoek eta milaka gizarte eta kultur eragileen konpromisoak gehituta saretutako oihal koloretsuak erabiliko dituzte, tartean Antxon larunbatean josiko dituztenak.
Anoetako ekitaldi nagusia girotzeko helburuz danborrada erraldoia antolatu du Gure Esku Dago-k ekainaren 21erako, herriz herri osatzen ari diren danbor jole sarearekin. Antxok ere bere danbor jole ordezkaritza bidali nahi du Anoetara, eta hori dela eta, herritarrak animatu nahi dituzte izena ematera. Danborradan parte hartu nahi dutenek Leunda tabernan, Urdin liburudendan edo Patxi estankoan apuntatu daitezke ekainaren 4a bitartean.
Horrez gain, Anoetan jo beharreko piezen artean batzuk berriak izango direnez, lau entsegu antolatu dituztela ohartarazi dute. Entseguak ekainaren 9an, 11n, 16an eta 18an egingo dituzte.
