Gaur hasi eta asteazkena bitartean zuri-gorri bihurtuko da Antxo; Zumardiko Topaguneak ekarriko du aurtengo berritasuna; Astelehenean, Euskal Eguna
Antxoko txupinazoa, iaz
20:00ak iristeko irrikaz egongo dira gaur antxotar asko. Ordu horretan egingo du eztanda Juanjo Bujandak elizaren kanpandorretik jaurtiko duen suziriak, sei eguneko etenik gabeko festari bide emanaz.
Festak arratsaldera arte hasiko ez diren arren, oparoa da gaurko egitaraua. Ohi bezala, txupinazoaren aurretik, 19:30ean, jaien aurkezpen ekitaldia izango da Gure Zumardian. Aurtengo sanferminetan omenduak izango diren pertsonak igoko dituzte oholtza gainera.
Gazteek, baina, ezin ordura arte itxaron, eta 17:30erako jarri dute hitzordua gaztetxean, karropoteoa-n hasteko.
Topagunea jaio da
19:00etarako, berriz, aurtengo sanferminetan herritarren plaza izateko bokazioz jaio den gune berriaren irekiera ekitaldia iragarrita dago. «Topa erraldoia» eginez, Topagunea zabalduko dute zumardian, «balore euskaldun, parekide eta parte hartzaileetan oinarritutako gunea». Txosna batzordeak bultzatuta, besteak beste, Basari elkarteak, AEK-k eta Harremantxo talde feministak parte hartzen dute Topagunean.
Gaztetxearekin elkarlanean, egitarau propioa landu du Topaguneak festetarako, eta egunero-egunero izango da bertan zerbaitekin gozatzeko aukera.
Gaur, esaterako, han izango da presoen aldeko brindisa, 20:30ean, eta ondoren, Harremantxok antolatuta, Emakumeen Mundu Martxaren aldeko lorategia irudikatuko dute bertan. 02:00etan, berriz, Gau Olinpiadak egingo dituzte Topagunean. Gaztetxean Reggae gaua ospatu ondoren izango da zumardiko kirol lehia.
Egitarau ofizialean, baina, badira ekitaldi gehiago. Helduen danborrada irtengo da gauerdian, eta dantzan egin nahi duenak baditu hainbat aukera: Iñigo Perurena Biterin izango da, Karlos DJa Azokan, Kresala taldea Gure Zumardian, eta DJ Bull Dani tabernaren karpan.
Bihar, bertsoak eta rocka
Jaietako bigarren egunean ere, goiz goizetik hasiko da festa. 06:00etan da diana, eta ordubete beranduago irtengo dira Luzuriagan Lasturreko Marques de Sakaren bigantxak lehenbizikoz jaietan.
Eguerdian, berriz, inudeen eta artzainen desfileak girotuko ditu Pasaiako barrutiko kaleak, eta arratsalderako, aldiz, IX. Bertso Jaialdi Mundiala iragarrita dago Mimosen eskutik.
Azokan, aurten, Andoni Egaña, Miren Amuriza, Amets Arzallus, Arkaitz Estiballes, Iker Zubeldia, Unai Agirre, Beñat Gaztelumendi eta Jon Maia ariko dira bertsotan. Gai jartzaile, aldiz, Arkaitz Oiartzabal Xamoa ariko da.
Baina bertso saioa bukatuta ere izango da nora jo. Basari elkarteko danborrada arratsaldez irtengo da aurten, 20:30ean, —orain arte gauez irteten zen— , eta kantinerarekin irten ordez, ordezkariekin desfilatuko du. Kristina Lopez eta eta Joxean Gartzia izango dira aurten Basari elkarteko ordezkariak.
Baina larunbata izanik, rock kontzertuak ezin falta. Gaztetxean ez ezik, Molinaoko Ardi Gorrin ere izango da kontzertua, Kaos&Semen jaialdiaren barruan.
Euskal Eguna
Etzi, Gazte Eguna ospatuko dute Antxon. Topagunean izango dute bilgunea gazteek, eta han izango dute bazkaria. Beren festa, ordea, barruti osoan sumatuko da, arratsaldean Elektrotxuflarekin irtengo baitira herrian zehar.
Berritasuna, ordea, astelehenean heldu da. Euskal Eguna izendatu du jai batzordeak, eta Txabol Sotoak antolatutako bazkarira baserritarrez jantzita joateko eskatu dute.
Asteartea San Fermin Eguna izanik, Saltseroen txanda izango da da, eta arratsaldean, nola ez, herri kirolen ikuskizunarena.
Haur eta erretiratuen eguna ospatuz amaituko dira aurtengo sanferminak, datorren asteazkenean. Bien bitartean, ordea, bada gozatzeko zer hautatu.
Egitaraua
