Larunbata arratsaldean dira San Miguel Ligako eta EuskoTreneko estropadak eta igande goizean KAE Ligakoa.
Sanpedrotarra Arraun Elkarteko Josetxo Aranburuk aurkeztu du estropada.
Pasaiako badian lehiatuko dira larunbatean San Migel Ligako laugarren estropada puntuagarria, III. La Caixa Bandera), eta emakumeen EuskoTren Ligako lehen estropada (Gipuzkoako Emakumeen Ligarako ere baliagarri da).
18:00etatik aurrera jokatuko da nesken estropada, eta igandean Donostian egingo denarekin batera, EuskoTrenen nor ariko den lehia izango da. Izan ere, bi estropaden artean denbora onenak egiten dituzten hiru traineruek (San Juan jada sailkatua dago, iazko irabazlea delako), jokatuko dute San Juanekin batera emakumeen liga nagusia. Bi estropadak Sanpedrotarra Arraun Elkarteak antolatuko ditu. Gaur eguerdian aurkeztu dituzte, Pedro Deunaren kofradian.
Emakumeek bi luze eta ziaboga bakarrean, 2.778 metro osatuko dituzte. Emakumeen estropada erlojupekoa izango da, eta iazko irabazle San Juanentzat ez ezik, irteera ordena zozketa bidez erabakiko dute egunean bertan. Guztira, zortzi traineruk hartuko dute parte nesken estropadan, tartean, eskualdeko bi: San Juan Iberdrola, eta Hibaika Jamones Ancin. Haiekin batera lehiatuko dira Arraun Donostiarra, Zumaia, Cabo, Hernani, Orio, eta Zarautz-Getaria.
Ziabogetan asmatzea giltzarri
Emakumeen estropada bukatu eta berehala San Migel Ligako estropada hasiko da, ligako laugarrena. Gizonek sei luze eta bost ziaboga egin beharko dituzte —Pasaiako bokalearen berezitasunek hala behartuta— guztira, 5. 556 metro osatuz; horrenbestez, maniobretan asmatzea hil ala bizikoa suerta daiteke gizonen estropadan. Horixe urtero-urtero Pasaiako estropadaren berezitasuna.
Gizonen estropadaren hiru txanda izango dira eta txanda bakoitzeko lau ontzi ariko dira nor baino nor. Txandak antolatzeko San Migel Ligako sailkapena hartuko dute kontuan eta horrenbestez San Pedro eta San Juan bigarren txandan irtengo dira larunbatean, Orio eta Astillerorekin batera; Meira, Portugalete, Zierbena, eta Kaiku lehen txandan irtengo dira, eta ohorezko txandan, azkenik, Tiran, Cabo, Urdaibai, eta Hondarribia izango dira arraunean.
Igandean I. Mindara Bandera
Gaur eguerdiko aurkezpenean Sanpedrotarra Arraun Elkarteko presidente Josetxo Aranburuak aditzera eman duenez,
Mindara elkartearekin hitzarmena egin du klub moreak. Horregatik, igande goizean Pasaian jokatuko den estropada, KAE2 Ligakoa, I. Bandera Mindara izango da. 11:00etan hasiko da igandean estropada.
Dibertsitate funtzionala duten pertsonak artatzeko Gipuzkoako elkartea da Mindara, eta kirol jardueren bidez aniztasunaren balioa sustatzea du xede. Aranburuk esan duenez, Mindara elkartearekin egin duten hitzarmenaren bidez, kirolean hain garrantzitsuak diren baloreak sustatu eta, bide batez elkarri laguntzea dute xede.
Festa giroa asteburu osoan
Estropadak laguntzeko jai egitarau paraleloa antolatu du Sanpedrotarra Arraun Elkarteak astebururako. Ostiralean jolasak eta puzgarriak izango dira 17:30ean, eta horrez gain, 19:00etan,
Haatik Dantza Konpainiak
Errimak oinetan ikuskizunaren emanaldia eskainiko du portuan. 20:30ean
Golden Apple Quartet-en kontzertua izango da portuan ere, eta ondoren DJa.
Larunbatean, berriz, Tirri-Tarrarekin kalejira antolatu dute 16:30etik aurrera frontoitik Kalparraraino. 18:00etan hasiko dira estropadak, eta 22:00etan kontzertua izango da.
