San Miguel eta EuskoTren ligetako estropadak jokatuko dira bihar badian; etzi, KAE2 Ligako I. Mindara Bandera jokatuko da; hiru estropadak San Pedrok antolatu ditu
La Caixa Banderaren aurkezpena San Pedron
Pasaiak aurtengo udan arraunarekin izango duen zitarik gorena heldu da asteburuan badiara. Hiru estropada lehiatuko dira bertan, hirurak Sanpedrotarra Arraun Elkarteak antolatuta. Bihar, San Miguel Ligako laugarren estropada puntuagarria, III. La Caixa Bandera, eta emakumeen EuskoTren Ligako lehen estropada jokatuko dira —Gipuzkoako Emakumeen Ligarako ere baliagarria da—. Etzi, berriz, KAE2 Ligako I. Mindara Bandera lehiatuko da.
18:00etatik aurrera jokatuko da nesken estropada bihar. EuskoTrenen nor ariko den erabakitzeko baliagarria da estropada, etzi Donostian jokatuko den bigarren sailkatze estropadarekin batera. Bi estropadetan denbora onenak egiten dituzten hiru traineruak sailkatuko dira, eta San Juanekin batera ariko dira emakumeen liga nagusian —arrosek ziurtatua dute parte hartzea, iaz liga hori irabazteagatik—.
Emakumeen estropada erlojupekoa izango da, bi luzekoa. Irteera ordena zozketa bidez erabakiko dute egunean bertan eta guztira, zortzi traineruk parte hartuko dute, Oarsoaldeko bi horien artean: San Juan eta Hibaika. Haiekin batera lehiatuko dira Arraun-Donostiarra, Zumaia, Cabo, Hernani, Orio, eta Zarautz-Getaria.
Ziabogetan ezin kale egin
Emakumeen estropada bukatu eta berehala San Miguel Ligako laugarrena hasiko da. Gizonek sei luze eta bost ziaboga egin beharko dituzte —Pasaiako bokalearen berezitasunek hala behartuta—; maniobretan asmatzea hil ala bizikoa suerta daiteke gizonen estropadan.
Gizonen estropadan hiru txanda izango dira eta txanda bakoitzeko lau ontzi ariko dira nor baino nor. Txandak antolatzeko San Miguel Ligako sailkapena hartuko dute kontuan eta horrenbestez San Pedro eta San Juan bigarren txandan irtengo dira bihar, Orio eta Astillerorekin batera; Meira, Portugalete, Zierbena, eta Kaiku lehen txandan irtengo dira, eta ohorezko txandan, azkenik, Tiran, Cabo, Urdaibai, eta Hondarribia.
Hondarribiak liga hasiera oso ona egin du, hiru lehietatik bi irabaziz eta bestean bigarren geldituz. Hori berretsi nahi dute Pasaian bihar, eta etzi Donostian San Juanek antolatuko duen Euskolabel banderan. San Juanek eta San Pedrok orain arte egindakoa indartu nahiko dute.
I. Mindara Bandera
Mindara elkartearekin hitzarmena egin du aurten Sanpedrotarra Arraun Elkarteak. Horregatik, etzi goizean Pasaian jokatuko den estropada, KAE2 Ligakoa, I. Mindara Bandera izango da. Dibertsitate funtzionala duten pertsonak artatzeko elkartea da Mindara. Lehian Oarso Bidasoko lau traineru ariko dira: Hondarribia B, San Pedro B, Hibaika eta Oiartzun.
Estropadak laguntzeko jai egitarau oparoa antolatu du San Pedrok astebururako.
Egitarau:
Gaur:
17:30: Puzgarriak eta jolasak frontoian.
19:00:
Errimak oinetan, Haatik dantza konpainiarena, portuan.
20:30. Golden Apple Quartet-en kontzertua Portuan.
Bihar:
16:30: Kalejira Tirri-Tarra taldearekin, frontoitik Kalparraraino.
18:00: Estropadak hasiko dira.
22:00: Kontzertua.
Etzi:
11:00: I. Mindara Bandera.
