Atzoko Gipuzkoako Txapelketan, emakumeen traineruek dena eman arren, ezin izan zuten Oarsoaldera txapelik ekarri.
Hibaika, atzo, Donostiako portuan lehorreratzen.
Zilarrezko domina San Juanek, laugarren postua Hibaikak, eta zazpigarrena Oiartzungo Itsaslapurrek. Atzo jokatu zen Gipuzkoako Traineru Txapelketa Donostian emakumeen kategorian, eta Oarsoaldeko traineruek Zumaiari aurre egin, baina azkenean ezin. Zumaiarrak izango dira, atzokoarekin berretsita dago, San Juanen eta Hibaikaren aurkari nagusiak banderak eta txapelketak lortzeko.
Ziabogatik azaldu zuren nagusitasuna Zumaiako traineruak. Bide erdian sei segundoko aldea atera zien arrosei, eta ordurako laugarren zen Hibaikari 13koa (ziabogan eta bukaeran hirugarrena Orio izan zen). Bukaeran handitu egin ziren tarte horiek, zilarrezko izan zen San Juan, irabazleetatik 9 segundo atzerago iritsiz. Hibaika azkenean 15era gelditu zen. Aurreko asteburuko estropadek, zein atzokoek, joera baten berri eman dute: San Juanek banderen lehia Zumaiarekin izango duela, eta Hibaikak hirugarren postuen bila joan beharko duela Oriorekin borrokatuz.
Oiartzungo Itsaslapurren emakumeen trainerua, bestalde, ari da apurka bidea egiten. Ongi gainera. Atzo zazpigarren izan ziren, Hernani atzean utziz eta Arraun-Donostiarra seigarrena ez oso urrun zutela. Ari dira eskarmentua hartzen oiartzuarrak, eta lehian pasatzen duten segundo bakoitza handiago egiteko baliagarri zaie.