EAJk euskaraz ez dakien Noemi Arberas liberatu izanak "atzerapausua" suposatuko duela salatu du EH Bilduk.
EAJ eta Garbizuren jarrera salatzeko joan den astean EHBilduk egindako agerraldia
Ostegunean legegintzaldi berriko lehen osoko bilkura deitu zuen Kepa Garbizu Lezoko alkateak. Plenoaren ostean, kezka azaldu du EH Bildu koalizioak, prentsa ohar bidez, “alkateak ez baitzuen galdera bakar bat ere erantzun”. Euskarak aurrerantzean udalean izango duen lekuarekin eta trataerarekin ere kezkatuta daudela esan dute koalizio subiranistaren ordezkariek, “atzerapausuak izango ditu euskarak merezi eta behar duen trataerarekin”. Horren adierazlea da EH Bilduren hitzetan EAJko Noemi arberas liberatu izana: “Gizarte Zerbitzuetako departamenduko ardura izango du Arberasek eta euskaraz hitz egiteko eta ulertzeko gaitasunik ez dauka. Nola ziurtatuko ditu euskaldunon hizkuntz eskubideak? Itzultzailearekin egin beharko dituzte herritarrek edo eragileek berarekin bilerak? Beste behin ere euskaldunak izango gara kaltetuak eta zerbitzuaren probretzea pairatuko dugunak”.
Orain arte euskaraz funtzionatu duen udala
Lezoko udalak euskaraz funtzionatzeko konpromezua orain urte asko hartu zuela esan du EH Bilduk, “eta azken urteetan horren guztiaren fruituak ikusi ditugu, euskara delarik udalaren hizkuntza. Bian zein izango da hemendik aurrera lan hizkuntza, zein hizkuntzetan egingo dira batzorde ezberdinak, tokiko gobernu batzordeakedota osko bilkurak?”. Ostegunean aldi bereko itzulpena erabili zutela plenoan esan du bestalde koalizioak, eta horrek izan dezaken kostuarekin kezka azaldu du, halaber.
Gaintxurizketako plataforma logistikoa
Euskarak izan dezaken atzeraupusua ez da ordea EH Bilduren buruhaustea eragin duen gai bakarra, Gaintxurizketan egin nahi duten plataforma logistikoaren gainean Garbizuk jarrera garbia azaldu ez izanak ere kezkatzen ditu, “prentsan ‘
uste dut alde gaudela‘ esan zuelako eta osoko bilkuran egin genion galderari ez ziolako inongo erantzunik eman. Gipuzkoako Buru Batzarretik agintzen dioten araberakoa izango da bere iritzia?”. Horren harira, EAJk noren interesak lehenetsiko dituen zalantzan dagoela salatu dute.
EH Bilduko ordezkariei EAJk eta horren buru den Kepa Garbizuk erakutsi dien “begirune falta” salatu du azkenik koalizioak. Sei zinegotzi lortu zituen EH Bilduk maitzeko hauteskundeetan, EAJk adina, “baina hala ere Gobernu batzordetik kanpo utzi gaitu”. Alkatetzara heldu zenetik Garbizu ez dela beraiekin bildu ere gogorarazi du EH Bilduk eta horren salaketa publikoa egin zuen joan den astean, “lanerako gogotsu eta prest gaude, baina ez dugu beraien zurikerian eta itxurakerian parte hartuko. Ez dugu uste hauek direnik beharrezkoak diren gutxieneko begirune eta baldintzak”.
