KAE2n, nabarmen hobera

KAE2n oso lan txukuna egiten ari dira San Pedro B, Hibaika eta Oiartzungo Itsaslapurrak, Asteburuan Plentzian eta Hibaikaren banderan egindako lana horren erakusgarri da. Oarsoaldeko Hitza.

Urko Etxebeste

Errenteria-Orereta,Oiartzun,Pasaia

2015/07/20

Hibaika, atzo, bere banderan lehian Pasaiako badian

Oarsoaldeko KAE2ko traineruek aurrera urratsa egin dute asteburuan. Hibaikak bereziki, baina San Pedro Bk eta Oiartzungo Itsaslapurrek ere, hazten ari direla azaldu dute Plentzian (Hondarribia Bk irabazi zuen) eta Pasaiako badian jokatu diren estropadetan. Larunbatean, Plentzian, aspaldiko emaitzarik onena lortu zuen Hibaikaren gizonen traineruak. Bigarren izan zen Hondarribia B irabazletik 10 segundora, eta Madalen ontziak azaldu zuen egoki ari dela egiten bidea, nork daki, mailaz igotzeko borrokan sartzeraino (sailkapen nagusian bosgarren dira errenteriarrak). Atzo, euren banderan, Errenteria Hiria III. Ikurrinan, apalago ibili ziren errenteriarrak Pasaiako badian, baina hala ere laugarren izan ziren bigarren eta hirugarrenetik ez oso urrutira: Castrok irabazi zuen Hibaikaren bandera. San Pedro B ere sentsazio onak ematen ari da. Oso erregular dabiltza moreak sasoi guztian zehar, eta larunbateko laugarren postuarekin eta atzo bigarrenarekin amets egiteko postuetatik hurbil daude Libia-koak. Eta sentsazio onekin jarraituz, Oiartzungo Itsaslapurren lana goraipatzekoa da. Hasiberriak dira, dena berria da haientzat, baina ari dira, eta egunetik egunera hobeto gainera. Izango zen baten bat aurten lan txarra egingo zutela esango zuena, baina horiei ahoa ixten ari zaizki Oiartzungo ontzia, oso lan txukuna egiten ari direlako. Larunbatean Plentzian eta atzo Hibaikaren banderan zortzigarren izan ziren urdinak, hau da, atzean sei talde utzi zituzten bietan. Ondo.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.